विराटनगर । प्रदेश १ सरकारले नेपाली महिला राष्ट्रिय टोलीका सदस्यहरुलाई नगद पुरस्कारसहित सम्मान गरेको छ । गत फागुनमा विराटनगरमा सम्पन्न महिला साफ च्याम्पियनसिपमा नेपाली टोली उपविजेता बनेको थियो ।
सरकारका मुख्यमन्त्री शेरधन राई र सामाजिक विकास मन्त्री जीवन घिमिरेले मंगलबार एक कार्यक्रमबीच जनही एक लाख नगदसहित खेलाडीहरुलाई सम्मान गरेका हुन । खेलाडी र अफिसियललाई पुरस्कृत गर्दै मुख्यमन्त्री राईले खेलको माध्यमबाट राष्ट्रको पहिचान बढ्ने बताए । महिला राष्ट्रिय टोलीका सदस्यलाई सोमबार विराटनगर महानगरपालिकाले जनही ५० हजार नगदसहित सम्मान गरेको थियो ।
साफ च्याम्पियनसिपको फाइनल खेलमा भारतसँग नेपाल ३–१ ले पराजित भएको थियो । प्रदेश सरकार र महानगरले पूर्व घोषणाअनुसार सम्मान गरेका हुन । प्रदेश सरकारले उपाधि जितेको अवस्थमा जनही २ लाख र उपविजेता भए १ लाख दिने घोषणा गरेको थियो । मुख्यमन्त्री राईले प्रदेश सरकार खेलक्षेत्रको विकासमा ध्यान दिने र खेलाडीलाई हौसला प्रदान गरिरहने बताए ।
