काठमाडौं । सरकारले प्रमुख प्रतिपक्षी दल नेपाली कांग्रेसका पूर्वसभापति तथा पूर्वप्रधानमन्त्रीहरु स्वर्गीय गिरिजाप्रसाद कोइराला र सुशील कोइरालाको नाममा रहेका अस्पतालहरुलाई संघीय सरकार मातहतमै राख्ने निर्णय गरेको छ । सोमबार बसेको मन्त्रिपरिषद् बैठकले गिरिजाप्रसाद कोइरालाको नाममा रहेको तनहुँको जीपी कोइराला राष्ट्रिय श्वासप्रश्वास उपचार केन्द्र र सुशील कोइरालाका नाममा रहेको बाँकेको सुशील कोइराला प्रखर क्यान्सर अस्पताललाई संघीय सरकार मातहतमा राख्ने निर्णय गरेको हो ।
मन्त्रीपरिषद् बैठकले कांग्रेसले अघि सारेको मागअनुसार नै दुवै अस्पताललाई संघीय सरकार मातहत राख्ने निर्णय गरेको पुष्टि गर्दै शिक्षामन्त्री गिरिराजमणि पोखरेलले संसद्को आगामी बैठकमा यसका बारेमा संसद्लाई जानकारी दिने बताएका छन् ।
यसअघि स्वास्थ्य मन्त्रालयले संघीय सरकार मातहतमा रहने गरी गठनादेशको निर्णयका लागि मन्त्रीपरिषद्मा पठाएका विभिन्न ११ अस्पतालमध्ये यी दुई अस्पताललाई सरकारले प्रदेश सरकारको मातहतमा राख्ने निर्णय गरेको थियो ।
उक्त निर्णयपछि प्रतिपक्षी कांग्रेसले पूर्वप्रधानमन्त्रीद्वय गिरिजाप्रसाद र सुशील कोइरालाले देशका लागि पुर्याएको योगदानको सरकारले अवमूल्यन गरेको भन्दै संसद् अवरुद्ध गर्दै आएको थियो ।