काठमाडौं । विपिन कार्की मुख्य भूमिकामा रहने भनिएको चलचित्र ‘फनफनी’ लामो समय वितिसक्दा पनि सुटिङमा नगएपछि विपिनले अब उक्त चलचित्रमा काम गर्ने गर्छन् कि गर्दैनन् टुङ्गो छैन ।
निर्देशक निश्चल बस्नेत र विपिनले साइनिङ अमाउन्टसमेत लिइसके पनि निर्माण पक्ष भद्रगोल टिमले समयमै चलचित्र निर्माण नगरेपछि अन्योल उत्पन्न भएको हो ।
“अघिल्लो माघ मै चलचित्र सुटिङमा जाने भनिएको थियो तर भएन । ‘फनफनी’ कै लागि भनेर मैले समय पनि छुट्टयाएर बसेँ तर सुरु भएन । कन्ट्रयाक अवधी नै सकिसकेको छ,” विपिन भन्छन्, “अब पुनः चलचित्र बनाउने हो र कथा चित्त बुझ्यो भने नयाँ कन्ट्रयाकमा जानुपर्ने हुन्छ ।”
विपिनले यो चलचित्र १७ लाख रुपैयाँमा साइन गरेका थिए । निर्देशन निश्चल बस्नेतलाई लिइएको थियो । हाँस्य टेलिश्रंखला ‘भद्रगोल’ले चलचित्र निर्माण गर्ने तयारी गरेको थियो ।
विपिन कार्की अहिले महंगो पारिश्रमिक लिने अभिनेता मध्येका एक हुन् । फरकफरक चलचित्रमा भिन्नभिन्न क्यारेक्टर निभाउनु उनको विशेषता हो ।