काठमाडौं । यु–१५ फुटबल टोलीका प्रशिक्षक सनोज श्रेष्ठले घरेलु मैदानमा साफ च्याम्पियन बन्ने लक्ष्यका साथ मैदान उत्रिने बताएका छन् । आज भएको प्रि–म्याच कन्फेरेन्समा प्रशिक्षक श्रेष्ठले अन्य टोलीभन्दा आफुहरु विगत १ बर्षदेखि तयारीमा रहेकाले उपाधि जित्ने बताए ।
उनले भने “एन्फा एकेडेमीमा रहेका खेलाडीहरु नियमित अभ्यासमा छन् बाँकी खेलाडी पनि खेलका लागि तयार भइसकेकाले राम्रो नतिजा निकाल्नेछौं ।”  यु–१५ साफ च्याम्पियनसिप बिहीबार (भोलि)बाट एन्फा कम्प्लेक्समा सुरु हुँदैछ ।  नेपालले समूह ए मा आफनो पहिलो खेलमा माल्दिभ्सको सामना गर्दैछ । प्रशिक्षक श्रेष्ठले पहिलो खेलमा सहज जित निकाल्दा अन्य खेलमा खेलाडीको मनोबल उच्च रहने भएकाले पहिलो खेलमा सहज जित निकाल्ने बताए । 

उनले भने “पहिलो खेलमा दबाब नै हुन्छ एकअर्को टिमबारे जानकारी पनि छैन । उमेर समूहका खेलहरु इन्टरनेटमा पनि हेर्न पाइँदैन पहिलो खेलपछि नयाँ रणनिती बनाउनेछौँ ।”  लामो समयदेखि तयारी रहेकाले सबै पक्ष राम्रो रहेको प्रशिक्षक श्रेष्ठको भनाई छ । कप्तान प्रदिप लम्सालले तयारी राम्रो रहेको र घरेलु मैदानमा उच्च मनोबलका साथ खेल्ने बताए । 

उनले भने “हामीले राम्रो तयारी गरेका छौँ तर अन्तिममा पहिलो किपर घाइते भयो किपिङ्मा केही समस्या हुन सक्छ हामी सजग भएर खेल्नेछौ ।”

यस्तै सहभागी अन्य ५ देशका प्रशिक्षकले उत्कृष्ट खेल प्रदर्शन गर्ने बताएका छन् । भुटानका प्रशिक्षक नकमुराले प्रत्येक खेल शतप्रतिशत दिएर खेल्ने बताए । उनले टोलीले ७ महिना तयारी गरेको र राम्रो प्रदर्शन गर्नेमा आशाबादी रहेको बताए ।  माल्दिभ्सका प्रशिक्षक इब्राहिम हाकिमले दुइ महिनाका तयारीले साफ च्याम्पीयन खेल्न आएको बताए । उनले माल्दिभ्समा गर्मी रहेको र यहाँको मौसमले खेलाडीलाई साथ दिने बताए । 

पाकिस्तानका प्रशिक्षक जोसे रोब्रेटो प्रोटेलाले विभिन्न समयका बाबजुद २० दिनको तयारीमा खेल्न आएको बताए । उनले छोटो तयारी भएपनि उत्कृष्ट प्रदर्शन गर्नेमा विश्वस्त रहेको बताए । बंगलादेशका प्रशिक्षक मोस्तफा अनुवार परेजले उमेर समूहमा खेलाडीले पहिलो पटक अन्तराष्ट्रिय खेल खेल्न लागेकाले पहिलो खेलपछि रणनिती बनाउने बताए । 

उनले पहिलो लक्ष्य सेमिफाइनल पुग्ने रहेको बताए । भारतका प्रशिक्षक पत्रकार सम्मेलनमा उपस्थित भएनन् । प्रतियोगिताको उद्घाटन खेलमा बिहीबार भारत र पाकिस्तान भिड्दैछन् । खेल बिहान साढे ११ बजे सातोबाटोस्थित एन्फा कम्लेक्समा सुरु हुनेछ ।