चितवन । चितवनका युवा व्यवसायी तथा पेसाकर्मीको समूह नमस्ते ग्रुपले १०५ घरधुरीलाई राहत सामग्री वितरण गरेको छ । भरतपुर महानगरपालिका–२, आँपटारीका सुकुम्बासी बस्तीमा उक्त ग्रुपले आज राहत सामग्री वितरण गरेको हो ।
ग्रुपले असहाय, अपांगता भएका, वृद्धवृद्धालाई लक्षित गरी चामल, तेल, नुल, दाल, सोयाविनलगायत वितरण गरेको हो । कोरोना कहरको बेला सामाजिक उत्तरदायित्व बहन गर्दै राहत सामग्री वितरण गरिएको ग्रुपले जनाएको छ ।
ग्रुपका संयोजक दिपेश श्रेष्ठले आगामी दिनमा क्रमशः बस्तीका अरु घरधुरीलाई पनि राहत सामग्री वितरण गरिने बताए । चेम्बर अफ कमर्स चितवनका उपाध्यक्ष गोपाल भट्टराईले व्यवसायी आफैँमा मर्कामा परेको बेला नमस्ते ग्रुपका सदस्यबाट स्वेच्छाले रकम संकलन गरी राहत सामग्री वितरण गरिएको जानकारी दिए ।
गत साता पोल्ट्री व्यवसायी मनोज रानाभाटले आफ्नो जन्मदिनको अवसरमा सोही बस्तीका १५ घरधुरीलाई राहत रकम वितरण गरेका थिए ।
