काठमाडौं । रेडबुल फुटसल लिग अन्तर्गत बिहीबार भएका खेलमा ढुकु फुटसल हवले जित हात पारेको छ । ढुकु फुटसल हवमा भएको खेलमा ढुकुले बानेश्वर रिक्रियसन सेन्टरलाई ८–४ गोल अन्तरले पराजित गर्यो ।  

ढुकुलाई जिताउन सुरज राउतले ह्याट्रिक गरे भने सवि केसी र प्रवेश अधिकारीले २/२ गोल गरे । त्यसैगरी अंशु कार्कीले एक गोल गरे । बानेश्वर रिक्रियसन सेन्टरका सुनिल तामाङले २ गोल गर्दा मानसाजन राजभण्डारी र सञ्जय श्रेष्ठले १/१ गोल फर्काए । यस खेलको म्यान अफ द म्याच ढुकु फुटसलका सविन केसी भए । 

त्यसैगरी कुमारी र सामाखुसी फुटसलले बराबरी खेलेका छन । कुमारी फुटसल पकनाजोलमा भएको खेलमा कुमारी र सामाखुसी फुटसलले ५–५ गोलको बराबरी खेले । कुमारीका अभिषेक रिजाल एक्लैले ५ गोल गरे भने सामाखुसीका नवीन लामाले २ गोल गर्दा रवि थापा, देवचन्द्र थापा र श्याम नेपालीले १/१ गोल गरे ।

एएमए इभेन्टको आयोजनामा होम एन्ड अवेको आधारमा २८ मंसिरसम्म सञ्चालन हुने लिगमा काठमाडौं, ललितपुर र भक्तपुरका १६ फुटसल टिम सहभागी छन् ।