काठमाडौं । सिञ्चाई मन्त्रालयका सहसचिव सागर राई चढेको गाडीले शनिबार भक्तपुरको लोकन्थलीमा बालिकालाई किचेको छ । 

सिञ्चाई मन्त्रालयको बा १ झ ४६९४ नम्बरको प्राडोले मध्यपुर ठिमी नगरपालिका–१६ लोकन्थलीमा तीन वर्षीया बालिका सान्भी भुसाललाई ठक्कर दिई घाइते बनाएको हो ।

बाटोमा निस्कँदै गरेको बच्चालाई ठक्कर दिएको र बच्चा लडेपछि ब्याक गरेर मार्न खोजेको बालिकाका बुबा शंकर भुषालले जानकारी दिए । दुर्घटनापछि सवारी भागेको उनको भनाइ छ । 

“हजुरबुबा साथमा रहेका बच्चालाई तत्काल निकाल्न सकियो । छोरीको अवस्था गम्भीर छ । उनको टाउकोमा गम्भीर चोट लागेको छ, बी एण्ड बी अस्पताल, ग्वार्कोको आईसीयूमा उपचार भइरहेको छ,” भुषालको भनाइ छ ।

उनले अगाडि भने, “ठक्कर पछि गाडी ब्याक गरेर किचेर मार्ने ड्राइभरको नियत देखिन्छ, पीडकलाई कडा कारबाही होस् ।”

 

चालक र गाडीलाई नियन्त्रणमा लिइएको महानगरीय प्रहरी परिसर भक्तपुरका प्रहरी नायव उपरीक्षक कृष्ण प्रसाईंले जानकारी दिए ।  ब्याक गरेर किचेको हुनाले बालिकाको अवस्था गम्भीर रहेको परिवार बताउँछ ।