काठमाडौं । स्वास्थ्य तथा जनसंख्या मन्त्रालयको तथ्यांकमा सबै अस्पताल तथा स्वास्थ्य संस्थामा मेडिकल चिकित्सकको पदपूर्ति भएको देखिए पनि वास्तविकता भने फरक पाइने गरेको छ ।  देशको एकमात्र सरुवा रोग अस्पतालका रुपमा रहेको  शुक्रराज ट्रपिकल तथा सरुवा रोग अस्पताल टेकुमा सरकारी दरबन्दीका मेडिकल अधिकृत तहका चिकित्सकहरु विदेश अध्ययनमा जाँदा अस्पताल छात्रवृत्तिमा रहेका चिकित्सकको भरमा चलेको छ । 

अस्पतालमा ११ जना मेडिकल अधिकृत तहका चिकित्सकको दरबन्दी  भए पनि अहिले एक जनामात्र मेडिकल अधिकृत तहका चिकित्सक कार्यरत छन् । अस्पतालका ७ जना मेडिकल अधिकृतहरु विदेश अध्ययनमा गएका छन् । अन्य ३ जना मेडिकल चिकित्सक अध्ययनका लागि अबको केही दिनमा नै विदेशिने तयारीमा रहेको अस्पताल प्रशासनले जनाएको छ । यसरी अध्ययन विदामा जाने चिकित्सकहरु करिब ३ देखि ५ वर्षसम्म विदेशमा नै रहने गरेका छन् । उक्त अवधिभर अस्पतालले छात्रवृत्तिमा एमबिबिएस पास गरेका चिकित्सकहरुको भरमा सेवा दिने गर्दै आएको छ ।

अस्पताल प्रशासन प्रमुख रामनारायण खतिवडा हाल मेडिकल अधिकृतको स्थानमा एमबिबिएस पास गरेका चिकित्सकहरुले ६ महिनादेखि करिब २ वर्षसम्म करारमा काम गरिरहेको बताउँछन् । उनी भन्छन्, “करारका चिकित्सकहरु आफ्नो करार अवधिसम्म मात्र काम गर्नुका साथै करार अवधि सकिएपछि काम छोड्छन् । त्यो समयमा बिरामीको सेवामा समस्या पर्छ तर स्थायी मेडिकल अधिकृत तहका चिकित्सकले नियमित सेवा दिने गर्छन्,” प्रशासन प्रमुख खतिवडाले भने, “अस्थायी चिकित्सक हुँदा कुनै जटिल रोग देखिए अप्ठेरो पर्ने गरेको छ ।” विदेशको  अध्ययन बिदामा कस्ता चिकित्सकलाई पठाउने भन्ने बारेमा सोच्नुपर्नेे बेला भएको प्रमुख खतिवडा बताउँछन् । 

अस्पतालका निर्देशक डा. वासुदेव पाण्डे स्थायी दरबन्दीका चिकित्सकहरु विदेश अध्ययन बिदामा जाँदा अर्को नयाँ चिकित्सक ल्याउन समस्या हुने बताउँछन् । अध्ययन बिदामा जानेहरुको दरबन्दी सिर्जना गरी रिक्त भएका ठाउँमा सरकारले नयाँ चिकित्सक पठाउने व्यवस्था मिलाउनुपर्ने डा. पाण्डेको भनाइ छ । 

अस्पतालमा ५ जना विशेषज्ञ चिकित्सकको दरबन्दी रहेकोमा हाल ३ जना चिकित्सक तथा ४१ जना नर्सको दरबन्दी रहेकोमा हाल ३६ जनामात्रै नर्स रहेका छन् । अस्पतालमा हरेक दिन १५० देखि २ सय जना बिरामी उपचारका लागि आउने गरेका छन् ।