काठमाडौं । बुध्द एयरले निर्धारित उडान रद्द गर्नु कम्पनीको बाध्यता भएको बताउँदै आफूहरुको समस्या बुझिदिन सम्पूर्ण यात्रुवर्गसँग अनुरोध गरेको छ । भौगोलिक बनावट, सानो धावनमार्ग, लगातार बदलिदो मौसम, प्राविधिक उपकरणको अभाव आदि इत्यादि कारणले नेपालभित्र सुरक्षित जहाज उडान गर्नु निकै चुनौतिपूर्ण कार्य रहेको एयरले जनाएको छ ।

यस्ता अप्ठ्याराहरुलाई हृदंगम गरि बुध्द एयरले अन्तर्राष्ट्रिय मापदण्ड अनुसार जहाजको उडान तथा मर्मतसम्भार कार्यहरुलाई अद्यावधिक गरिराखेको जारी विज्ञप्तिमा उल्लेख गरेको छ ।

जाडो मौसममा बाक्लो हुस्सु कुहिरो लाग्नु स्वभाविक भएकाले बाक्लो हुस्सु र खराव मौसमले अप्रत्याशित रुपमा विमानस्थल बन्द हुन पुग्ने बुध्द एयरले जनाएको छ ।
जहाज उडानका लागि यथेष्ट भिजिविलिटी नहुँदा उडानहरु विलम्वका साथै रद्द हुनु पनि स्वभाविक नै भएको कम्पनीले जनाएको छ ।

१५ माघ सोमबारका दिन विराटनगर विमानस्थलमा २००० मिटरको मात्र भिजिबिलिटी भएकाले सुरक्षाका दृष्टिकोणले बुध्द एयरले निर्धारित काठमाडौं–विराटनगर–काठमाण्डौका सबै उडानहरु रद्द गरेको जानकारी विज्ञप्तिमार्फत दिएको छ । 

वैकल्पिक विमानस्थलको रुपमा रहेको भैरहवा विमानस्थल हुस्सुको कारणले बन्द थियो भने नेपालगन्ज दिउँसो ३ बजेबाट रनवे मर्मत सम्भारका कारण सञ्चालनमा आएको थिएन । 

निर्धारित उडान रद्द गर्नु कम्पनीको बाध्यता भएकोले बुध्द एयरले यात्रुलाई सुरक्षा चासो बुझिदिन र कम्पनीको प्रयासमा साथ दिन अनुरोध गरेको विज्ञप्तिमा उल्लेख गरेको छ । विज्ञप्तिमा बुध्द एयरले यात्रुसुरक्षा बाहेक अन्य कुनै पनि कारणले उडान नरोकेको जनाएको छ ।