काठमाडौं । वीर अस्पतालले नयाँ प्रविधिको रेडियोथेरापी मेसिन (टेमोथेरापी) फागुनको दोस्रो सातबाट सञ्चालनमा ल्याउने भएको छ । अस्पतालले पुरानो कोवाल्ट मेसिनलाई व्यवस्थापन गर्न नसक्दाँ नयाँ मेसिन सञ्चालनमा ल्याउन ढिलो भएको अस्पतालले बताएको छ । 

२० वर्ष पुरानो मेसिन दुई वर्षदेखि बिग्रिएर थन्किएपछि दैनिक ५० देखि ६० जना विरामी समस्यामा परेका थिए र तीमध्ये अधिकांश निजी अस्पताल धाउँथे ।

वीर अस्पतालका निर्देशक डा. भुपेन्द्र बस्नेतले केही दिनभित्रै नयाँ रेडियोथेरापी मेसिन नेपाल आइपुग्ने जानकारी दिए  । 

“यो थेरापी सेवा सञ्चालनमा आएपछि उपचार सहज हुनेछ । दैनिक क्यान्सरको उपचार गर्न आउने सबै बिरामीलाई दुई सिफ्ट गरेर सेवा दिने छौँ,” निर्देशक डा. बस्नेतले बाह्रखरीसँग भने ।

निजी अस्पतालमा हाल क्यान्सरका बिरामीले निजी अस्पतालमा रेडियोथेरापी गर्दा डेढदेखि दुई लाख रुपैयाँसम्म खर्च गर्नुपर्छ । तर, यो सेवा वीर अस्पतालले सञ्चालनमा ल्याएपछि ५ हजार रुपैयाँमा नै यो सेवा लिन सकिने निर्देशक डा. बस्नेत बताउँछन् । 

अहिले रेडियोथेरापी सेवा भक्तपुर क्यान्सर अस्पताल, भरतपुर क्यान्सर अस्पताल, नेपाल क्यान्सर अस्पताल र काठमाडौँ क्यान्सर सेन्टरले दिँदै आएको छन् । 

वीर अस्पतालका क्यान्सर विभागका प्रमुख चिकित्सक डा. विवेक आचार्यका अनुसार “सामान्यतः क्यान्सरका बिरामीले पाँचदेखि सात सातासम्म रेडियोथेरापी गर्नुपर्छ । क्यान्सर भएका बिरामीलाई अप्रेसनअघि रेडियोथेरापी जरुरी हुन्छ । रेडियोथेरापीले ट्युमरको आकार घटाउने र अप्रेसन गर्न सजिलो बनाउने काम गर्छ ।” 

त्यसैगरी, चिकित्सा विज्ञान राष्ट्रिय प्रतिष्ठान (न्याम्स) का उपकुलपति प्रा.डा.गणेश गुरुङले भन्छन्, “ हामीले नयाँ प्रविधियुक्त टेमोथेरापी मेसिन ल्याउने भएका हौँ, अमेरिकाबाट मेसिन सिपिङ (पानीजहाज) मार्फत आउँदैछ अबको केही  दिनमा नेपाल आइपुग्छ । यस अवधिमा हामीले उक्त मेसिन राख्ने ठाउँ निर्माण गदैर्छौं, फागुनको दोस्रो साताबाट विरामीलाई सेवा दिने लक्ष्य ।”

वीर अस्पतालमा ल्याउन लागेको टोमोथेरापी मेसिन क्यान्सर उपचारको लागि संसारमै गुणस्तरीय र नयाँ प्रविधियुक्त मानिन्छ । यसले क्यान्सर नभएको कोषिकाहरूलाई कुनै असर नपुर्‍याइ क्यान्सरको उपचार गर्छ । 

“हामीले सञ्चालन गर्न लागेको यो मेसिन नेपालमा नै पहिलो हो,” उपकुलपति डा. गुरुङले भने । 

त्यस्तै, विक्रम् सम्वत् २०७१ सालमा वीर अस्पतालमा उपचार गर्न आएका एक हजार तीन सय क्यान्सरका रोगीमध्ये आठ सयलाई रेडियाथेरापी गरिएको थियो । ०७२ सालदेखि रेडियोथेरापी सेवा बन्द छ  । पूर्व स्वास्थ्य मन्त्री गगन थापाले दुई वर्षअघि बिग्रिएको उक्त मेसिन किन्नको लागि रु १५ करोड रुपैयाँ विनियोजन गरेका थिए । पछि अपुग भएपछि पुनः छलफल गरी सरकारले २५ करोड थपेर रु ४० करोड पु¥याएको थियो ।