काठमाडौं । अमेरिकी राष्ट्रपति डोनाल्ड ट्रम्पले अमेरिकाले चीनसँग ‘सम्झौता’ गरेको दाबी गरेका छन् । ट्रम्पले आफ्नो सामाजिक प्लेटफर्म ट्रुथमा पोस्ट गरेर यस्तो जानकारी दिएका हुन् । 

“हामीले चीनसँग सम्झौता गरेका छौँ, जुन राष्ट्रपति सी र मेरो अन्तिम स्वीकृतिको अधीनमा छ,” ट्रम्पले लेखेका छन्, “फुल म्याग्नेट र आवश्यक पर्ने धेरै दुर्लभ तत्त्वहरू चीनले अग्रीम रूपमा प्रदान गर्नेछ ।” 

उनले थपेका छन्, “त्यस्तैगरी, हामी चीनलाई सहमति भएको कुरा प्रदान गर्नेछौँ, जसमा हाम्रा कलेज र विश्वविद्यालयहरूमा आउने चिनियाँ विद्यार्थीहरू पनि समावेश छन्, जुन मेरा लागि सधैँ राम्रो कुरा हो !”

करको बारेमा ट्रम्पले लेखेका छन्, “हामीले कुल ५५ प्रतिशत कर पाइरहेका छौँ, चीनले १० प्रतिशत पाउँछ, सम्बन्ध एकदम राम्रो छ !”

यसैबीच, चिनियाँ विदेश मन्त्रालयका प्रवक्ता लिन जियानले एक्समा पोस्ट गर्दै चीन–अमेरिका आर्थिक तथा व्यापार परामर्श संयन्त्रको पहिलो बैठक लन्डनमा सम्पन्न भएको जानकारी दिएका छन् । 

वार्ताको क्रममा, दुवै पक्षले स्पष्ट र गहन कुराकानी गरेको र चासोका आर्थिक र व्यापारिक मुद्दाहरूमा विचार आदानप्रदान गरेको उनले बताएका छन् ।