काठमाडौं । भारतको पूर्वी राज्य पश्चिम बंगालमा एउटा होटेलमा लागेको भीषण आगलागीमा परी दुई बच्चासहित कम्तीमा १४ जनाको मृत्यु भएको छ । 

मंगलबार राति कोलकाता सहरको ऋतुराज होटेलमा भएको उक्त घटनामा दुईजना गम्भीर रूपमा घाइते भएको बीबीसीले जनाएको छ । अहिले आगो नियन्त्रणमा आएको र प्रहरी र उद्धारकर्मीले उद्धार अभियान जारी राखेका छन् । 

आगलागी कसरी सुरु भयो भन्ने बारेमा अहिलेसम्म कुनै स्पष्ट जानकारी प्राप्त भएको छैन । घटनाको छानबिन गर्न प्रहरीले विशेष अनुसन्धान दल गठन गरेको बताइएको छ ।

भरतीय प्रधानमन्त्री नरेन्द्र मोदीले सामाजिक सञ्जाल एक्समा एक पोस्ट गर्दै घटनाप्रति दुःख व्यक्त गर्दै पीडित परिवारलाई आर्थिक सहयोग दिने घोषणा गरेका छन् ।

समाचार अनुसार आगो लागेपछि होटेलभित्र रहेका मानिसहरू छततिर भागेर सहयोगका लागि अपिल गरेको सामाजिक सञ्जालमा राखिएका भिडियोमा पनि देखिन्छ ।

भारतीय एक्सप्रेस अखबारका अनुसार त्यहाँको फायर ब्रिगेडले हाइड्रोलिक सिँढी प्रयोग गरेर किनारामा फसेकाहरूलाई उद्धार गरेका थिए । प्रहरीका अनुसार होटेलभित्र बसेका धेरै मानिस आफ्ना कोठाबाट बाहिर निस्कन सकेनन् ।