धनगढी  । धनगढीमा आयोजना हुने नेपालआईस सुदूरपश्चिम खप्तड गोल्डकप फुटबल प्रतियोगिताको  तयारी अन्तिम चरणमा पुगेको छ । शुक्रबारबाट सुरु हुने मोफसलकै सर्वाधिक धनराशि पुरस्कार भएको गोल्डकपको तयारी अन्तिम चरणमा पुगेको आयोजकले जनाएको छ ।

आयोजक सुदूरपश्चिम—११ स्पोर्ट्स क्लबका अध्यक्ष सुरेश हमालले प्रतियोगिताको लागि खेल मैदान सम्याउने, अतिरिक्त प्यारापिट निर्माण, टिकट व्यवस्थापन, खेलाडीलगायतको बसोबासको व्यवस्थापनका काम सकिने चरणमा पुगेको जानकारी दिए । 

अध्यक्ष हमालले झण्डै एक महिनादेखि तयारीमा जुटेको आयोजक टोलीले विभिन्न समितिहरु बनाएर काम गरिरहेको र प्रतियोगिताको लागि सबै कार्य अन्तिम चरणमा पुगेको बताए । धनगढीस्थित क्षेत्रीय खेलकुद रंगशालामा पुस २१ देखि सुरु भई माघ १ गतेसम्म सञ्चालन हुने प्रतियोगिताको लागि आयोजकले रोलिङ गरेर मैदान सम्याएको छ । मैदानलाई अन्तर्राष्ट्रिय स्तरको रुपमा खेल खेलाउनका लागि तयार पारिएको मैदान व्यवस्थापन समितिका संयोजक चक्र मल्लले जानकारी दिए  ।

झण्डै ३ हजार ५ सय दर्शक क्षमताका दुई वटा प्याराफिट रहेको अवस्थामा फुटवलमा पहिलो पटक कृत्रिम प्याराफिट निर्माण गरिँदैछ । झण्डै १५ सय दर्शक क्षमताको कृत्रिम प्याराफिट निर्माण भइरहेको छ । प्रतियोगिताका लागि धनगढीकै स्किल नेपाल नामक कम्पनीले कृत्रिम प्याराफिट बनाइरहेको सुदूरपश्चिम ११ स्पोर्टस क्लबका उपाध्यक्ष योगेन्द्र चन्दले बताए ।

प्रतियोगितामा नेपालका चर्चित ए डिभिजन क्लबहरु मनाङ मस्र्याङ्दी, सिएमजी संकटा, त्रिभुवन आर्मी, झापा ११, साहारा क्लब पोखरा, अग्नी रुपन्देही ११, सुदूरपश्चिम ११, धरान फुटबल क्लब, एपिएफ क्लब, च्यासल युथ क्लब र थ्री स्टर क्लबले प्रतिस्पर्धा गर्दैछन् । यस्तै, भुटानको डुक स्टार क्लबले समेत प्रतियोगितामा सहभागिता जनाएको छ ।

आयोजकले सहभागी १२ टोलीहरुलाई दुई समूहमा विभाजन गरेर खेल तालिका सार्वजनिक गरिसकेको छ  । प्रतियोगिताको उद्घाटन खेल आयोजक सुदूरपश्चिम ११ स्पोर्टस क्लब र काठमाडौंको च्यासल युथ क्लवका बीचमा हुनेछ  ।

प्रतियोगिताको विजेताले ११ लाख ११ हजार १११ र उपविजेताले पाँच लाख ५५हजार ५५५ नगद पुरस्कार पाउने छन् । त्यस्तै विभिन्न विधाका उत्कृष्ट हुनेले १५–१५ हजार र उत्कृष्ट एक खेलाडीलाई मोटरसाईकल पुरस्कार प्रदान गरिनेछ । प्रत्येक खेलका म्यान अफ दि म्याचलाई १०–१० हजारका दरले पुरस्कार प्रदान गरिनेछ ।

सिजी ग्रुपको नेपाल आईस ब्राण्डको मुख्य प्रायोजनमा हुने प्रतियोगितामा टिकट काटेर खेल हेर्न जाने दर्शकहरुलाई प्रत्येक दिन गोलाप्रथाद्वारा मोवाइल प्रदान गरिने छ । प्रतियोगिताको सहप्रायोजकमा नेपाल टेलिकम रहेको छ ।