काठमाडौं । स्पेनिस ला लिगा लिडर बार्सिलोनाले आज जर्मन बुन्डेसलिगाको टिम बोरुसिया डर्टमन्डविरुद्ध आज यूईएफए च्याम्पियन्स लिग क्वार्टरफाइनलको पहिलो लेगमा प्रतिस्पर्धा गर्दै छ । जारी सिजन च्याम्पियन्स लिगमा यी दुई टिमबीचको यो दोस्रो भेट हो । यसअघि, लिग चरणमा दोस्रो स्थान हासिल गरेको क्याटालन टोली बार्सिलोनाले जर्मन क्लबविरुद्ध ३–२ को जित निकालेको थियो । 

च्याम्पियन्स लिगको इतिहास हेर्ने हो भने पछिल्लो पाँच खेलमा बार्सिलोनाविरुद्ध डर्टमन्ड जितविहीन छ । यी पाँच खेलमा बार्सिलोनाले डर्टमन्डलाई तीन पटक हराउँदा दुई खेल बराबरीमा समाप्त भएको थियो । जसमा स्पेनिस क्लबले नौ गोल गर्दा चार गोल बेहोरेको तथ्यांक छ ।

रोमाञ्चक तथ्य के भने बार्सिलोना (हेन्सी फ्लिक) र बोरुसियाका प्रशिक्षक (निको कोभाक) दुवैले कुनै समय बायर्न म्युनिखमा एकसाथ सहकार्य गरेका थिए । सन् २०१८–१९ सिजन फ्लिकले कोभाक बायर्नको मुख्य प्रशिक्षक हुँदा सहायक प्रशिक्षकको रूपमा काम गरेका थिए । उनै कोभाच गएको जनवरीदेखि डर्टमन्डको जिम्मेवारीमा आएका हुन् ।

खेलको पूर्वसन्ध्यामा आयोजित पत्रकार सम्मेलनमा फ्लिकले पूर्वसहकर्मीको क्लबस्थित र आक्रामक फुटबल खेल्ने टिम भएको बताए ।

“डर्टमन्ड निकै स्थित र आक्रामक फुटबल खेल्ने टिम हो । तर, हामीले च्याम्पिन्स लिगको होम र अवे दुवैमा राम्रो प्रदर्शन गरिरहेका छौँ । उनीहरू रक्षात्मकरूपमा निकै बलियो छन् । उनीहरूको टिमबाट केही खेलाडी चोटका कारण बाहिर छन् । तर, अनुपस्थित खेलाडीको स्थानमा उनीहरूसँग अरू राम्रा खेलाडीहरू छन्,” फ्लिकले भने ।

यता, डटर्मन्डका प्रशिक्षक कोभाकले बार्सिलोनाको आक्रमण क्षमताबारे आफूहरू सजग रहेको बताए । उनले बार्सिलोना बलियो देखिए पनि आफ्नो टोली गत सिजनको उपविजेता भएको जनाए । 

“हामीले एकअर्कालाई राम्रोसँग बुझेका छौँ । हामीलाई दुवैको फुटबललाई हेर्ने नजरबारे पनि राम्रो जानकारी छ । हामी बार्सिलोनाका फरवार्डको क्षमताबारे सजग छौँ र हामीले राम्रोसँग रक्षात्मक भूमिका निभाउन आवश्यक छ,” प्रशिक्षक कोभाकले भने, “हामी उनीहरूको कमजोरीको फाइदा उठाउँदै खेल जित्ने प्रयास गर्नेछौँ । मलाई लाग्छ भोलिको खेलमा बार्सिलोना प्रवल दाबेदार हो । तर, डर्टमन्डले गत सिजन फाइनल खेलेको कुरा भुल्न हुँदैन । फुटबलमा हरेक कुरा सम्भव छ ।”

बार्सिलोनाको मैदान स्टाडियो ओलिम्पिधक लुईस कोम्पनिजमा हुने यो खेल नेपाली समयअनुसार राति १२ः४५ बजेदेखि सुरु हुनेछ ।