काठमाडौं । नेपाली कांग्रेसका महामन्त्री गगनकुमार थापाले विगतमा मिल्काइसकेको पात्रको बारेमा छलफल गर्ने समय नरहेको टिप्पणी गरेका छन् । शनिबार बाह्रखरी मिडियाले काठमाडौंमा आयोजना गरेको एनसेल बाह्रखरी गल्फ तथा आर्थिक परिसंवाद कार्यक्रममा महामन्त्री थापाले पूर्वराजा ज्ञानेन्द्र शाहलक्षित टिप्पणी गरेका हुन् ।

प्रतिनिधिसभाका सांसदसमेत रहेका थापाले २०८०/०९० को दशकमा आएर विगतमा फालिसकेको पात्र र विषयमा छलफल गरेर बस्ने समय नरहेको बताएका हुन् । उनले राजतन्त्र 'नचाहिने', 'थोत्रो' भइसकेको टिप्पणी गरे ।

"अबको ८/१० वर्ष भित्रमा यो २०८० देखि ०९० सालसम्मको यो १० वर्ष यो नचाहिने, थोत्रो, भइसकेको, हिजो लगेर एक ठाउँमा मिल्काइसकेको, थन्काइसकेको विषय र पात्रको बारेमा छलफल गरेर टाइम खेर फाल्ने होइन," उनले भने ।

उनले अबको एक दशक आईटीको निर्यातलाई पाँचगुणा बनाउने, तलब तीनगुणा बढाउने र आईटीको पूर्वाधार बढाउने विषयको बहस गर्नुपर्ने बताए । उनले अबको ८/१० वर्षभित्र कीर्तिपुरको डाँडामात्रै नभई अन्य ठाउँमा पनि दुई–चार लाख रुपैयाँ कमाउन सक्ने स्थिति बनाउन सकिने बताए ।

"हामी अबको ८–१० वर्षभित्रमा मलाई फेरि पनि मेरो विश्वास छ । कीर्तिपुरको डाँडामात्रै होइन, त्यस्ता थुप्रै डाँडामा साथीहरूले दुई–चार लाख रुपैयाँ कमाएको स्थिति हामी बनाउन सक्छौँ । त्यो पोटेन्सियल हामीसँग छ," थापाले भने ।