काठमाडौं । प्रधानमन्त्री केपी शर्मा ओलीले देश भूगोल, जनसंख्या र युवा जनशक्तिमा धनी रहेको भन्दै यसको समन्वय हुँदा मुलुकले चाँडै फड्को मार्ने अवस्था रहेको बताएका छन् । शनिबार (चैत २३) काठमाडौंमा ‘एनसेल बाह्रखरी गल्फ तथा आर्थिक परिसंवाद’ कार्यक्रममा उनले हाम्रा पुस्ताको अध्ययन, अनुसन्धान र सीपको जेनेटिक मेमोरी पनि नेपालीका निम्ति थप सम्पत्तिकै रूपमा रहेको बताए ।

विगतमा गरेको विकास र अध्ययन, अनुसन्धान भने विभेद र गलत प्रवृत्तिले रोकिएको भन्दै उनले यसलाइ अगाडि बढाउने आधार अझै बलियो रहेको बताए । “हाम्रो देशमा कस्ता कस्ता उल्टा बुद्धिका मानिसहरू आए, जुन महिलाहरूले वेदका रचना गरे, तिनै महिलाहरूले वेद पढ्नु हुँदैन भन्ने आयो । महिलाहरू चुलोचौकोमा बस्नुपर्छ, अर्काले देख्नु हुँदैन, हाँस्न हँदैन भन्ने गलत मान्यताले आधा जनसंख्यालाई प्यारालाइज्ड गरिदियो,” प्रधानमन्त्री ओलीले भने, “अर्कातर्फ जातीय विभाजनले अछूत सिर्जना गरिदियो । त्यसले प्रगतिलाई बाधा खडा गरिदियो ।”

उनले यस्ता विभेद र गलत प्रवृत्तिले पुस्ताहरूले हस्तान्तरण गरेको ज्ञान विस्तारित हुन नपाउँदा देशले प्रगति गर्न नसकेको बताए । “हाम्रा पुस्ताले दिएको ज्ञानमा प्रगति हुन पाएन । यही विभाजनले हामी शताब्दीऔँ पछाडि पर्‍यौं,” प्रधानमन्त्री ओलीले भने ।

उनले त्यस्ता प्रवृत्तिले विकास र प्रगतिलाई शताब्दीसम्म रोकेर हस्तान्तरण अवरुद्ध पारे पनि त्यसको जेनेटिक मेमोरी (आनुवांशिक ज्ञान) बाँकी रहेको उल्लेख गरे ।

“तर, हामीसँग अन्त्यन्त अन्वेषक, अनुसन्धाता, इनोभेटिभ पुस्ता जसले ज्ञान विज्ञान र अनुसन्धान गरेका थिए, तीनको जेनेटिक मेमोरी हामीसँगै छ,” उनले भने, “यसको मतलब हामी छिटो सिक्न सक्ने सामर्थ्य राख्छौँ ।”

प्रधानमन्त्री ओलीले त्यसबाहेक नेपाली इमानदार र मिहिनेती भनेर विश्वसमुदायमा परिचय बनाएको भन्दै यसले पनि विकासलाई गति दिन काम गर्ने बताए । “हामीसँग अहिले ६० प्रतिशत क्रियाशील जनसंख्या छ । ४० प्रतिशत वा सोभन्दा बढी नै युवा जनशक्ति छ । र, युवा जनसंख्याको लाभ अब आधा शताब्दीपछि नरहन पनि सक्छ,” युवापुस्तालाई उपयोग गर्नुपर्ने संकेत गर्दै प्रधानमन्त्रीले भने, “किनभने, यसको जनसांख्यिक प्रवृत्ति खतरनाक देखिँदै छ । यसमा हामी अलिकति सतर्क हुनुपर्छ ।”

उनले विकास गर्न नसक्ने समाज नभएको भन्दै त्यसका निम्ति स्रोत पनि हामीसँगै रहेको बताए । “हामी विकास गर्न नसक्ने होइन, विकास गर्न सक्छौँ,” उनले भने, “विकासका निम्ति पानी, वनजंगल सबै चिज छ । हाम्रो देश यी चिजमा धनी छ । भूगोल, जनसंख्या र युवा जनशक्ति हामीसँग अथाह छ ।”