काठमाडौं । प्रहरीले ललितपुरबाट ठूलो परिमाणमा अवैध लागुऔषध बरामद गरेको छ । वीरगन्जबाट काठमाडौंतर्फ आइरहेको भारतीय एम्बुलेन्सबाट उक्त लागुऔषध बरामद भएको हो । 

चैत २३ गते (आज) बिहान १ बजेर ५५ मिनेटको समयमा ललितपुरको बागमती गाउँपालिका–३ छपेलीबाट ठूलो परिमाणमा अवैध लागुऔषध बरामद भएको जिल्ला प्रहरी परिसर ललितपुरले जनाएको छ ।

मकवानपुरबाट कान्तिलोकपथ हुँदै काठमाडौं आउँदै गरेको बीआर०५प ०४२१ नम्बरको एम्बुलेन्समा लागुऔषध बरामद गरिएको जिल्ला प्रहरी परिसर ललितपुरका सूचना अधिकारी एवं प्रहरी उपरीक्षक नरहरि रेग्मीले जानकारी दिए । 

एम्बुलेन्समा राखेर ल्याइएको ९४ हजार ८० वटा ट्याब्लेट ट्रामाडोल बरामद गरिएको हो । लागुऔषध कारोबारमा संलग्न चारजनालाई पक्राउ गरिएको उनले जानकारी गराए । 

पक्राउ पर्नेहरू सबै भारतीय नागरिक हुन् । भारतीय एम्बुलेन्समा एक बालक र एक बालिका समेत रहेका थिए । 

बिरामीलाई उपयोग गरेर लागुऔषध ओसारपसार भएको देखिएको प्रहरीले जनाएको छ ।