काठमाडौं । नेपाली मुवाँथाई खेलाडी गुणराज रुचालले अस्ट्रेलियाको पर्थस्थित लिजेन्ड्स एकेडेमीमा प्रशिक्षणको अवसर पाएका छन् । त्यसका लागि उनी मंगलबार अस्ट्रेलिया प्रस्थान गरेका छन् ।

“खेलाडीका रूपमा मैले थुप्रै राष्ट्रिय तथा अन्तर्राष्ट्रिय प्रतियोगिता खेलेँ । पदक पनि जितेँ । अब प्रशिक्षकका रूपमा नयाँ अध्याय सुरु गर्दै छु । त्यो पनि विदेशी भूमिमा । मलाई यो अवसर प्रदान गर्नु भएकोमा एकेडेमीका प्रबन्ध निर्देशक डेनियल डसनलाई धेरैधेरै धन्यवाद दिन चाहन्छु,” अस्ट्रेलिया उड्नुअघि गुणराजले भने, “उहाँ (डेनियल) चारपटकका मुवाँथाई च्याम्पियन, तीनपटकका किक बक्सिङ च्याम्पियन र एकपटकका बक्सिङ च्याम्पियन हुनुहुन्छ । उहाँजस्तो मार्सल आट्र्स क्षेत्रका दिग्गज व्यक्तित्वसँग काम गर्ने अवसर पाएकोमा भाग्यमानी ठानेको छु ।”

गत भदौमा पनि गुणराज केही समय लिजेन्ड्स एकेडेमीसँग जोडिएका थिए । त्यसबेला उनले लिजेन्ड्समै विशेष प्रशिक्षण लिएका थिए । गुणराजले करिब १२ वर्ष ६ महिना अवधि सेनामा रहेर हालै उपदानमा राजीनामा दिएका थिए ।

करिब एक दशकको मुवाँथाई यात्रामा ३२ वर्षीय गुणराजको मुख्य उपलब्धि भनेको एक वर्षअघि बैंककमै भएको १९औँ विश्व मुवाँथाई च्याम्पियनसिपमा जितेको स्वर्ण हो । उनले सेमी प्रोको पुरुष ५४ केजीमा स्वर्ण जितेका थिए । त्यो स्वर्ण नेपाली मुवाँथाईको इतिहासमा कुनै पनि खेलाडीले सेमी प्रोमा जितेको एक मात्र स्वर्ण हो । १९औँ संस्करणअघि गुणराजले १७औँ र १८औँ संस्करणको विश्व च्याम्पियनसिपमा कांस्य जितेका थिए । उनी १३औँ र १५संस्करणको विश्व च्याम्पियनसिपमा पनि सहभागी भएका थिए । यी सबै विश्व च्याम्पियनसिप थाइल्यान्डमा भएको थियो ।

गुणराज विभिन्न समयमा भएका नेपाल मुवाँथाई च्याम्पियनसिप, टप ५ मुवाँथाई प्रो फाइट, तेस्रो, चौथो र आठौँ संस्करणको इन्डो–नेपाल मुवाँथाई च्याम्पियनसिप र तेस्रो केब्याग अन्तर्राष्ट्रिय मुवाँथाई च्याम्पियनसिपका स्वर्ण विजेता हुन् । पाँचै प्रतियोगिता नेपालमा भएका थिए ।

उनी थाइल्यान्डमै भएको प्रोफेसनल मुवाँथाई फाइट र फेयरटेक्स प्रोफेसनल फाइटका विजेता हुन् । उनले २०१६, २०१८ र २०२२ को वर्ष उत्कृष्ट मुवाँथाई खेलाडीको अवार्ड जितेका छन् । उनले कम्बोडियामा भएको दोस्रो विश्व कुन्खेमरमा पनि नेपालको चुनौती प्रस्तुत गरेका थिए ।