काठमाडौं । इरानी राष्ट्रपति मसूद पेजेश्कियनले अमेरिकी राष्ट्रपति डोनाल्ड ट्रम्प प्रशासनसँग देशको परमाणु कार्यक्रमबारे प्रत्यक्ष वार्ता गर्न अस्वीकार गरेका छन् । अप्रत्यक्ष वार्ताका निम्ति खुला रहने उनले बताएका छन् ।

इरान सिद्धान्ततः वार्ताको विरोधी नभएको उनले स्पष्ट पारेका छन् । तर, वासिङटनले आफ्नो पहिलेको गलत आचरण सच्याएर विश्वासको वातावरण निर्माण नगरेसम्म प्रत्यक्ष वार्ता नगर्ने उनले तेहरानमा आइतबार बसेको मन्त्रिपरिषद् बैठकमा बताएका अलजजिराले उल्लेख गरेको छ ।

अमेरिकी राष्ट्रपति ट्रम्पले यसअघि वासिङटनसँग सम्झौता नभए इरानमा बम आक्रमण गर्ने र थप व्यापारिक शुल्क लगाउने धम्की दिएका थिए । “यदि, उनीहरूले सम्झौता गर्दैनन् भने बम प्रहार हुनेछ,” ट्रम्पले आइतबार अमेरिकी टेलिभिजन संस्था एनबीसीसँगको टेलिफोन अन्तर्वार्तामा भनेका थिए ।

ट्रम्पका अनुसार, परमाणु कार्यक्रमबारे सम्झौता नगरेमा चार वर्षअघिझैँ इरानविरुद्ध थप व्यापारिक शुल्क लगाउने सम्भावना छ । दुई देशबीचको यो बयानबाजीले त्यहाँ तनाव बढ्दै गएको अलजजिराले जनाएको छ ।