काठमाडौं । उपप्रधान एवं अर्थमन्त्री विष्णु पौडेलले राजतन्त्रले शिर उठाउनु शमसानघाटबाट मुर्दालाई ब्युँताउने कोसिस गर्नुभएको टिप्पणी गरेका छन् । आइतबार काठमाडौंमा आयोजित एक कार्यक्रममा बोल्दै मन्त्री पौडेलले नेपालमा फेरि राजतन्त्र कहिल्यै शासनसत्तामा आउन नसक्ने बताए ।

राजतन्त्रले आफ्नो औचित्यमाथि प्रश्न खडा गरेका कारण नेपाली समाजबाट सदाका लागि बिदा भएर गएको उनको भनाइ छ । उनले राजतन्त्रको विद्रुप अनुहार गत शुक्रबार सडकमा देखिएको टिप्पणी गरे ।

उक्त आन्दोलनले राजावादीहरू हिंसा, आतंक, लुटपाट र नागरिकको मौलिक हकको विरुद्धमा रहेको देखिएको बताए । गणतन्त्रवादी दलहरूलाई जनताको बलमा स्थापित संघीय लोकतान्त्रिक गणतन्त्रलाई बलियो बनाएर अघि बढ्ने अभिभारा रहेको उल्लेख गरे ।

"समाप्त भएको राजतन्त्र जसरी आज शिर उठाउने कोसिस गर्दैछ यो वास्तवमा शमसानघाटबाट मुर्दालाई ब्युताउँने कोसिस जस्तै हो । नेपालमा राजतन्त्र कहिल्लै पनि फर्कन सक्दैन । शासनसत्तामा आउन सक्दैन । यो कुरामा हामीले कुनै पनि दुविधा राख्नु हुँदैन । जहाँसम्म राजतन्त्रवादीहरूको कुरा छ । राजतन्त्रका हिमायतीहरूको कुरा छ । उनीहरूको वास्तविक चरित्र के हो दुईदिनअघिको घटनामा प्रकट भएको छ । राजतन्त्रको विद्रुप अनुहार सडकमा देखिएको छ," उनले भने ।

दलहरूले जनताका आवश्यकता र आकांक्षाहरूलाई ठिक ढंगले सम्बोधन गर्दै सबै प्रकारका विभेद र असमानताहरूलाई समाप्त पार्नेगरी अगाडि बढ्न जरुरी रहेको समेत बताए ।