काठमाडौं । गोर्खाली फिटनेसका उमेश राईले १७औँ संस्करणको धर्मश्री शारीरिक सुगठन प्रतियोगिताको उपाधि जितेका छन् । शनिबार (चैत ९) काठमाडौंको कमलादीस्थित नेपाल प्रज्ञा–प्रतिष्ठानमा आयोजित प्रतियोगिताको ओभरलतर्फ राईले ग्यालेक्सी फिटनेसका ललित धिमाललाई पछि पार्दै उपाधि रक्षा गरेका हुन् ।

उपाधिसँगै उनले नगद १२ लाख रुपैयाँ, ११ किलोग्राम वजनको ट्रफीसहित मेडल, प्रमाणपत्र, चीन घुम्ने अवसर र अरू उपहार प्राप्त गरे । उनी प्रतियोगिताको १६औँ संस्करणका पनि विजेता हुन् ।

उपविजेता बनेका धिमालले नगद ६ लाख रुपैयाँ पाए । तेस्रो भएका दाङका माधव सुवेदीले नगद तीन लाख प्राप्त गरे ।

धर्मश्रीमा दुईपटक उपाधि चुम्ने राई तेस्रो खेलाडी हुन् । नरेश महर्जन र सानु गुरुङले यसअघि दुईपल्ट उपाधि जितेका थिए ।

६ तौल समूहमा प्रतिस्पर्धा भएको थियो । प्रत्येक तौल समूहका विजेताले अन्तिम चरणमा धर्मश्रीको उपाधिका निम्ति प्रतिस्पर्धा गरेका थिए । नेपाल ब्यायाम मन्दिरले प्रतियोगिता आयोजना गरेको हो ।

यस्तै, महिला बडी बिल्डिङ खुलातर्फ भक्तपुर डिस्पिराडोकी तारा खाइजु विजयी भइन् । कम्प्लिट हेल्थ क्लबकी शान्ता पालिखे उपविजेता र डिभाइन फिजिकल फिटनेसकी उर्मिला श्रेष्ठ तेस्रो भइन् । उनीहरूले क्रमशः दुई लाख, एक लाख र ७० हजार रुपैयाँ पुरस्कार पाए ।