काठमाडौं । नेपाली सेनाले संविधानप्रदत्त जिम्मेवारी पूरा गर्न सेना सदैव कटिबद्ध रहेको जनाएको छ । 

सेनाको जनसम्पर्क निर्देशनालयले बुधबार एक विज्ञप्ति जारी गर्दै नेपालको स्वतन्त्रता, सार्वभौमसत्ता, भौगोलिक अखण्डता, स्वाधीनता र राष्ट्रिय एकताका निम्ति संविधानप्रदत्त जिम्मेवारीहरू पूरा गर्न नेपाली सेना सदैव कटिबद्ध रहेको जनाएको हो । 

विगत केही दिनयता विभिन्न सञ्चारमाध्यम र सामाजिक सञ्जालमार्फत नेपाली सेनालाई जोडेर विभिन्न प्रकारका टीकाटिप्पणी, धारणा र विश्लेषणहरू सम्प्रेषण भएको भन्दै निर्देशनालयले जनसम्पर्क तथा सूचना निर्देशनालयसँग सम्पर्क गरेर यथार्थपरक सूचनामात्रै सम्प्रेषण गर्न अनुरोध गरेको छ । 

सेनाले आफ्नो धारणा र गतिविधिहरू नियमित रूपमा पत्रकार सम्मेलन, प्रेस विज्ञप्ति, प्रेस नोट, आधिकारिक सामाजिक सञ्जाल र सैनिक कार्यक्रमहरूमार्फत सार्वजनिक गर्दै आएको पनि जनाएको छ ।