काठमाडौं । प्रधानमन्त्री कप एकदिवसीय राष्ट्रिय क्रिकेट प्रतियोगितामा कर्णाली प्रदेशले दोस्रो जित निकालेको छ । 

रूपन्देहीको एक्स्ट्रा टेक ओभलमा मंगलबार भएको खेलमा कोसी प्रदेशलाई १२७ रनले पराजित गर्दै कर्णालीले दोस्रो जित निकालेको हो । कर्णालीले दिएको २ सय १९ रनको मध्यम लक्ष्य पछ्याएको कोसी ३५ ओभरमा ९१ रनमा समेटिएको थियो । 

कोसीका लागि चिराग साहले सर्वाधिक २५ रन जोडे । त्यसअघि टस जितेर ब्याटिङ गरेको कर्णालीले निर्धारित ५० ओभरमा ९ विकेट गुमाएर २ सय १८ रनको योगफल तयार गरेको थियो । कर्णालीका लागि अर्जुन घर्तीले नट आउट रहँदै सर्वाधिक ८८ रन जोडेका थिए । 

त्यस्तै सिद्धार्थ क्रिकेट मैदानमा भएको खेलमा वाग्मती प्रदेशले गण्डकी प्रदेशलाई ६९ रनले पराजित गर्‍यो । वाग्मतीले दिएको २ सय ८९ रनको लक्ष्य पछ्याएको गण्डकी ४४ ओभरमा २१९ रनमा अल आउट भयो ।  गण्डकीका लागि वंश क्षेत्रीले सर्वाधिक ५५ रन जोडे । 

त्यसअघि टस हारेर ब्याटिङको निम्तो पाएको बागमतीले निर्धारित ५० ओभरमा ८ विकेट गुमाएर २८८ रनको योगफल तयार गरेको थियो । बागमतीका लागि इशान पाण्डेले सर्वाधिक ६९ रन जोडेका थिए । जितसँगै वाग्मती ५ खेलमा ४ अंक जोडेको छ भने गण्डकीको ५ खेलमा २ अंक रहेको छ ।