काठमाडौं । काठमाडौंको थापाथली चोकबाट नर्भिक अस्पताल जानेतर्फको सहायक सडक एक सातासम्म पनि मर्मत भएको छैन । सडक  विभाग र काठमाडौं उपत्यका खानेपानी लिमिटेड (केयूकेएल)को टकरावले सडक पिच नभएको हो । 

गत फागुन २० गते मंगबार बिहान करिब ५ः२० बजे मेलम्चीको थोक वितरणतर्फको पाइप फुटेर सडक जलमग्न भएको थियो । त्यसपछि काठमाडौं उपत्यका खानेपानी लिमिटेड (केयूकेएल)को टोलीले सडक खनेर पाइप मर्मत गरेको थियो । 

केयूकेएलले खनेको सडक समयमै पिच नहुँदा सो क्षेत्रको सवारी आवागमन असहज भएको छ । पाइप फुटेको करिब ४० मिनेटपछि मात्रै पानी बन्द गर्दा करिब पाँच लाख लिटर पानी खेर गएको थियो ।

काठमाडौं महानगरपालिका वडा नम्बर ११ का वडाध्यक्ष हिरालाल तण्डुकारले सडक मर्मत गर्न अझै ३–४ दिन लाग्ने बताए । 

“पहिले खनिएको खाल्डोबाट अझै पनि पानी आएको भन्ने छ । पछि फेरि पानी बाहिर निस्किन नदिने गरी मर्मत गर्नुपर्‍यो । त्यसैले अझै समय लाग्ला,” वडाध्यक्ष तण्डुकारले भने । वडाध्यक्ष तण्डुकारले सडक पिच गर्नका निम्ति गएराति गिट्टी ल्याएर राखिएको पनि बताए ।  

मेलम्ची खानेपानी आयोजना कार्यान्वयन निर्देशनालयले नेपाल विद्युत् प्राधिकरणको तार भूमिगत गर्ने क्रममा पाइपमा चोट लाग्दा खानेपानीको पाइप फुटेकोे निष्कर्ष निकालेको थियो । केयूकेएलले पाइप त्यतिबेलै मर्मत हुने बताएको थियो । 

केयूकेएलका प्रवक्ता प्रकाशकुमार राईले सडक विभागसँग समन्वय भइरहेको बताए । “सडक विभागसँग समन्वय गरिरहेका छाैँ । अहिलेसम्म विभागले केही भनेको छैन । अबको केही दिनमा सडक पिच होला,” उनले भने । 

सडक विभागले भने आफ्नो मातहतमा सो सडक नपर्ने जनाएको छ । विभागका प्रवक्ता तथा उपमहानिर्देशक अर्जुनप्रसाद अर्यालले आफ्नो मातहतमा नपर्ने बताए । “बबरमहलको सडक हाम्रो मातहत पर्‍थ्यो । हामीले बनायौँ । तर, थापाथलीको सडक पर्दैन । त्यसैले विभागले बनाउँदैन,” उनले भने । 

काठमाडौं उपत्यकामा समन्वयकारी भूमिकामा रहेका निकायहरू (विद्युत् प्राधिकरण, सडक विभाग, केयूकेएल र काठमाडौं महानगरपालिका)ले एकआपसमा समन्वय नगर्दा एउटाले बिगार्ने अर्कोले बनाउने क्रम चलिरहन्छ । 

गत माघ ३० गते बुधबार बबरमहलमा विद्युत् प्राधिकरणले खानेपानीको पाइप फुटाउँदा सडक, आसपासका सरकारी कार्यालय र निजी घरहरू डुबानमा परेका थिए ।   

त्यसबेला पनि केयूकेएलले विद्युत्को तार भूमिगत गर्ने क्रममा खानेपानीको पाइपमा क्षति पुग्दा पाइप फुटेको भन्दै प्राबिधरणलाई दोषारोपण गरेको थियो । सो सडक विभागले नै मर्मत गरेको थियो । 

केयूकेएलले सडक विभागसँग समन्वय गरेर थापाथली सडक पिच गर्ने दाबी गरेको छ । केयूकेएलका प्रवक्ता राईले सडक विभागले नै बनाउने बताए । “सडक विभागलाई पत्र पठाएका छौँ । विभागले नै थापाथली सडक बनाउँछ,” उनले भने ।