काठमाडौं । प्रधानमन्त्री केपी शर्मा ओलीले देश बनाउन हरेक व्यक्तिले आफ्नो क्षेत्रबाट सक्ने काम गर्नुपर्ने बताएका छन् । मंगलबार (फागुन २०) ट्रेड युनियन आन्दोलनको ७८औँ स्थापना दिवसका अवसरमा काठमाडौंमा आयोजित कार्यक्रममा उनले यस्तो बताएका छन् ।

आफ्नो ठाउँबाट सकेको काम गरेर सघाइए देश बन्न समय नलाग्ने उनले उल्लेख गरे । “सरकारतिर मात्रै हेर्ने होइन, हामी हरेकले जुन ठाउँमा उभिएर जे काम गर्न सक्छौँ, त्यो गर्नुपर्छ देश बनाउनका लागि,” उनले भने ।

जसरी पनि विरोध गरेर राम्रो काम गर्न नदिने परिपाटी हुनु दुःखद भएको उनले बताए । राम्रो कार्य गर्नेलाई झुटो आरोप लगाउने, काम गर्न नदिने परिपाटी विकसित भइरहको भन्दै उनले चिन्ता व्यक्त गरे । उनले यसअघि प्रधानमन्त्री बन्दा आफूले १०१ ऐतिहासिक काम गरेको जिकिर गरे ।

“...एक लाखभन्दा बढी एसईई दिने विद्यार्थीलाई ४८ प्रतिशत मात्रै पास हुने स्थिति नहोस् भनेर उनीहरूलाई अनलाइन क्लास दिइरहेको छ । युवाहरूको ठूलो साथ, सहयोग र सहभागिता छ,” उनले भने, “यसपटक कम्तीमा ६० प्रतिशत नतिजा पुर्‍याउने उद्देश्य मैले राखेको छु ।”

न्यूनतम पारिश्रमिक नदिइए कारबाही : प्रधानमन्त्री
प्रधानमन्त्री ओलीले अझै न्यूनतम ज्यालाका निम्ति लड्नुपर्ने अवस्था रहेको बताए । कतिपय गैरसरकारी अस्पतालमा नर्सहरूले न्यूनतम पारिश्रमिक नपाएको गुनासो आफूले सुनेको उनले उल्लेख गरे ।

उनले न्यूनतमभन्दा कम पारिश्रमिक दिएर काममा लगाउन नपाइने र त्यसो गरेको पाइए कारबाही गर्ने चेतावनी दिए । पारिश्रमिक कुनै पनि बहानामा न्यूनतमभन्दा कम दिन नपाइने उनले स्पष्ट पारे ।

“...यो न्यूनतम पारिश्रमिकभन्दा तलको पारिश्रमिक दिएर काममा लगाउन कतै पनि पाइँदैन,” उनले भने, “यो दण्डनीय कानुन लाग्ने विषय बनाउनु पर्दछ । पारिश्रमिक कुनै पनि बहानामा न्यूनतमभन्दा तल दिन पाइँदैन ।”

रोजगारीका अवसर उद्यमशिलताबाट सिर्जना गर्न सकिने उनको भनाइ थियो । न्युज एजेन्सी नेपाल