विराटनगर । नेकपा (एमाले) मोरङको नयाँ नेतृत्व चयन गर्न निर्वाचन कार्यतालिका सार्वजनिक गरिएको छ । कोसी प्रदेशको राजधानी विराटनगरमा एमालेको दशौँ जिल्ला अधिवेशन भइरहेको छ । निर्वाचन प्रक्रिया थाल्न सोमबार कार्यतालिका सार्वजनिक गरिएको हो ।

तालिका अनुसार, सोमबार बिहान ८ बजेबाट निर्वाचन प्रक्रिया प्रारम्भ भइसकेको छ । निर्वाचन मण्डलले आइतबार साँझ नै निर्वाचनसम्बन्धी काम थाल्ने तयारी गरेको थियो ।

तर, मनोनीत गरिएका ४६ जना अधिवेशन प्रतिनिधिको नामावलीको विषयमा इतर समूहले विरोध जनाएको थियो । आइतबारको बन्दसत्रमा एकलौटी ढंगले प्रतिनिधि मनोनीत गरेको भन्दै इतर समूहले हलभित्रै नाराबाजी गरेको थियो । त्यसपछि बन्दसत्र रोकिएको थियो ।

प्रमुख निर्वाचन अधिकृत सुरेशलाल श्रेष्ठले अब कार्यतालिका प्रभावित नहुने गरी प्रक्रिया अघि बढाउने आफूहरूको प्रयास रहने बताए । तर, समस्या समाधान नगरी कार्यतालिका आएकोमा आफूहरूको सहमति नरहेको इतर समूहका एक नेताले बताए ।

सोमबार बिहान १० बजेपछि मनोनयन दर्ता गर्ने र दिउँसो २ः४५ बजेदेखि ५ बजेसम्म नयाँ नेतृत्वका लागि मतदान गर्ने कार्यसूची छ । मतदान गणना भने एमाले जिल्ला कार्यालय पाञ्चनालीको भवनमा हुने तय भएको छ । 

अविधेशनबाट नेतृत्वमा जान संस्थापनबाट राजकुमार ओझा र इतर समूहका अजम्बर राई चुनावी मैदानमा उत्रिएका छन् । ओझा केपी ओली र राई विद्यादेवी भण्डारी निकट मानिन्छन् । 

संस्थापनबाट उपाध्यक्ष शान्ति भुजेलल र सचिव रविन थापा हुने बताइएको छ । यसैगरी इतरबाट उपाध्यक्ष सागर थापा, सचिव सोमराज थापा, उपसचिवमा उषा झा र सन्तोष वान्तवालाई उठाउने तयारी रहेको बताइन्छ । अधिवेशनबाट १६५ सदस्यीय नयाँ जिल्ला कार्यसमिति चयन हुनेछ । जसका लागि ९१४ जना प्रतिनिधिले मतदान गर्नेछन् ।