काठमाडौं । इटालीका विश्वकप विजेता गोलकिपर जियानलुइजी बुफोनले नेपाल आउँदा आफूलाई सपना पूरा भएजस्तो अनुभव भएको बताएका छन् । 

राष्ट्रिय युवा संघको आयोजनामा भइरहेको केपी ओली कपको तेस्रो संस्करणका निम्ति नेपाल आएका बुफोनले आइतबार आयोजित सञ्चारकर्मीसँगको अन्तरक्रियामा आफ्ना लागि नेपाल रहस्यमयी देश भएको बताए ।

“म नेपाल र नेपालीबारे जान्न इच्छुक छु । मलाई थाहा छ, यो म र मेरो श्रीमतीका लागि अविश्वमरणीय बन्नेछ । मेरा लागि नेपाल रहस्यमयी देश थियो । किनकि, म युवा अवस्थामा हुँदा विश्वको नक्सा हेर्दा नेपालको झन्डा सधैँ अरूभन्दा फरक पाउँथेँ । यसले र यहाँको हिमालहरूले मलाई नेपालप्रति आकर्षित गराउँथ्यो,” बुफोनले भने, “पक्कै पनि यो मेरा लागि सपना पूरा भएको जस्तै हो । मलाई नेपालमा आमन्त्रित गर्नुभएकोमा आयोजक र नेपाली अधिकारीहरूलाई धन्यवाद व्यक्त गर्न चाहन्छु । र, म भोलि कसले केपी ओली कपको उपाधि जित्छ भन्ने हेर्न उत्सुक छु ।”

यस्तै, बुफोनले नेपाली टिमले विश्व फुटबलको ठूला अन्तर्राष्ट्रिय प्रतियोगितामा सहभागिता जनाएको हेर्ने आफ्नो चाहना रहेको समेत बताए ।

“म नेपाली फुटबल टिमलाई ठूला प्रतियोगिता एसियन कप, विश्वकपमा हेर्न चाहन्छु,” बुफोनले थपे ।

इटालीले सन् २००६ मा फ्रान्सलाई हराएर विश्वकपको उपाधि जित्दा बुफोन प्रतियोगिताको उत्कृष्ट गोलकिपर चुनिएका थिए । उनले इटालीबाट १७६ अन्तर्राष्ट्रिय खेलमा प्रतिनिधित्व गरेका छन् ।

सन् १९९७ मा अन्तर्राष्ट्रिय फुटबलमा डेब्यू गरेका बुफोनले सन् २०१८ मा सन्न्यास लिएका थिए । उनले व्यावसायिक फुटबलबाट भने सन् २०२३ मा सन्न्यास लिएका थिए ।