काठमाडौं । सिन्धुपाल्चोकको भैरवकुण्ड आसपास केन्द्रविन्दु भएर आज बिहान गएको ६ दशमलव एक म्याग्निच्युडको भूकम्पका बेला भाग्दा काठमाडौंमा दुईजना घाइते भएका छन् । 

काठमाडौं उपत्यका प्रहरी कार्यालयका प्रवक्ता प्रहरी वरिष्ठ उपरीक्षक शेखर खनालले बानेश्वरमा भाग्ने क्रममा दुईजना घाइते भएको जानकारी दिए । आज बिहान २ बजेर ५१ मिनेटमा भूकम्प गएको थियो ।

घाइते हुनेमा उदयपुरको त्रियुगाका घर भई शान्तिनगर बस्ने प्रशान्त थिलिङ र नवलपरासी मध्यविन्दु घर भई बानेश्वर बस्ने हरि गैरे रहेका छन् ।

थिलिङ भाग्ने क्रममा सडकपेटीमा लडेर घाइते भएका र गैरे होस्टेलबाट भाग्ने क्रममा घाइते भएको प्रहरीले जानकारी दिएको छ । 

नेपाल प्रहरीका प्रवक्ता तथा प्रहरी नायब महानिरीक्षक दिनेशकुमार आचार्यले पूर्वी नेपालमा केही घर भत्किएका र केही सामान्य घाइते भएका जानकारी आए पनि ठूलो क्षति नभएको जानकारी दिए ।  रासस