काठमाडौं । नेपाल प्रहरीका संयोग कपाली र एभीएमकी इभाना थापा मगरले प्रथम पुष्पराज शाक्य स्मृति टेबलटेनिस प्रतियोगितामा स्वर्ण जितेका छन् । खुला सिंगल्सको पुरुषमा संयोग र महिलामा इभाना पहिलो भएका हुन् ।

खोल्चा पुखु खेलकुद समितिद्वारा आयोजित प्रतियोगिताको पुरुष सिंगल्स फाइनलमा संयोगले एभीएमका सुजन गडाललाई ७–११, ११–४, ११–८, १०–१२ र ११–६ को सेटमा पराजित गरे ।

ललितपुर महानगरपालिका–११ को मुख्य प्रायोजन तथा स्पिन इभेन्ट प्रालिको व्यवस्थापनमा भएको प्रतियोगिताको महिला सिंगल्सको उपाधि भिडन्तमा इभानाले एभीएमकै वियंका राईलाई १०–१२, ११–८, १२–१० र ११–७ को सेटमा हराइन् ।

शंखमूलस्थित इलेभन स्टार क्लबमा प्रतियोगितामा ६ स्पर्धामा प्रतिस्पर्धा भएको थियो । यसअघि, पुरुष भेट्रान सिंगल्सको ६० वर्षमाथि पूर्णशंकर श्रेष्ठ, ५० वर्षमाथि इखाछेंका राजेन्द्र बज्राचार्य र ४० वर्षमाथि काठमाडौंका उमेश मानन्धरले पहिलो स्थान हात पारे । वडा नम्बर ११ को यू–१६ मा सोयम महर्जन पहिलो भए ।

प्रतियोगिताको कुल पुरस्कार राशि दुई लाख रुपैयाँ रहेको छ । पुरुष/महिला सिंगल्समा शीर्ष तीन स्थान हात पार्नेले क्रमशः ३० हजार, १५ हजार र सात हजार ५०० नगद पुरस्कार हात पारे । बाँकी चार स्पर्धामा पहिलो हुनेले १० हजार, दोस्रोले पाँच हजार र तेस्रोले दुई हजार ५०० नगद पुरस्कार पाए ।

विजेतालाई प्रदेश खेलकुद विकास परिषद्, वाग्मती प्रदेशका सदस्य–सचिव दीपक लामा, मुख्य प्रायोजक वडा नम्बर ११ का अध्यक्ष अरोजकुमार खड्गीलगायतले एक कार्यक्रमबीच पुरस्कृत गरे । तीनदिने प्रतियोगितामा १५० खेलाडी सहभागी थिए ।