काठमाडौं । स्वर्गद्वारी गुठीपीडित मोही किसानले काठमाडौंमा आन्दोलनसहित धर्ना सुरु गरेका छन् ।

दाङ देउखुरीबाट आएका स्वर्गद्वारी गुठीपीडित मोही किसानले आफ्ना विभिन्न माग राखेर आइतबार काठमाडौंको माइतीघरमा आन्दोलनमा उत्रिएका हुन् ।

दाङमा २०८० फागुन ७ बाट करिब १ महिना लामो आन्दोलन गरेर तत्कालीन सरकारसँग दुईबुँदे सम्झौता भए पनि हालसम्म उक्त सम्झौता सरकारले कार्यान्वयन नगरेपछि गुठीपीडित आन्दोलनका लागि काठमाडौं आएका हुन् ।

सहमति भएका बुँदा कार्यान्वयन गर्न पटक–पटक सम्बन्धित निकायहरूमा धाउँदा पनि वास्ता नगरेका कारण संघीय राजधानी काठमाडौं आउनुपरेको स्वर्गद्वारी गुठीपीडित मोही संघर्ष समितिका अध्यक्ष प्रभु चौधरीले गुनासो सुनाए ।

दशकौँदेखि खनजोत गर्दै आएको जग्गाको स्वामित्व किसानहरूले नपाउँदा अन्यायमा भएको भन्दै आन्दोलनसहित धर्ना दिनुपरेको अध्यक्ष चौधरीले बताए ।

‘‘जबसम्म भोगचलन गर्दै आएको जग्गाको जग्गाको लालपुर्जा प्राप्त गर्दैनौँ तबसम्म हाम्रो आन्दोलन र धर्ना चलिरहनन्छ,’’ अध्यक्ष चौधरीले भने । 

विभिन्न माग लेखेका प्लेकार्ड, किसानले प्रयोग गर्दै आएका विभिन्न औजारसहित गुठीपीडित आन्दोलनमा उत्रिएका हुन् ।