काठमाडौं । अर्थमन्त्री विष्णु पौडेलले निर्माण व्यवसायीलाई सरकारले अघिल्लो वर्षको भुक्तानी दिइसकेको बताएका छन् । आइतबार महिला आर्थिक पत्रकार संघ फेजाले आयोजना गरेको कार्यक्रममा अर्थमन्त्री पौडेलले अघिल्लो सरकारले बोकाएको सबै भुक्तानी दायित्व वर्तमान सरकारले पूरा गरेको बताए ।

उनले अघिल्लो वर्षको दायित्व चालु आर्थिक वर्षको बजेटमार्फत भुक्तानी गर्नु पर्दा केही समय अप्ठेरो परे पनि अहिले अर्थ मन्त्रालयले त्यो दायित्व बेहोरेर अघि बढेको बताए । उनले अब निर्माण व्यवसायीको कानुनबमोजिमको बिल भुक्तानी सहजरूपमा दिन सक्ने अवस्थामा सरकार पुगेको बताए ।

उनले सरकारले निर्माण व्यवसायीहरूले कानुनसम्मतरूपमा दाबी गरेको भुक्तानी नरोकेको उल्लेख गरे । अर्थमन्त्री पौडेलले अघिल्लो वर्षको भुक्तानी सकेर विधिपूर्वक भुक्तानीका लागि आएका दाबीलाई सहजरूपमा निर्माण व्यवसायीहरूले पाउने अवस्था आएको बताए ।

उनले भुक्तानी दायित्वबाट सरकार बाहिर निस्किएको भन्दै अब निर्माण व्यवसायीहरूले भुक्तानी नपाएको गुनासो गर्नु सान्दर्भिक नदेखिने बताए ।

उनले सरकारले निर्माण व्यवसायीहरूले विधिपूर्वक गरेको दाबी भुक्तानी बाँकी नभएको र दाबी भए बाँकी नराख्ने प्रतिबद्धता जनाए । उनले बैंकहरूको महत्त्वपूर्ण हिस्सा घरजग्गा व्यवसायमा लगानी भएको बताए । उनले घरजग्गा कारोबार चलायमान हुन सक्दा समग्र अर्थतन्त्रमा परेको उल्लेख गरे । उनले मापदण्ड पूरा गरेर नै बैंकहरूले घरजग्गामा लगानी गरेको भन्दै घरजग्गा कारोबार गर्ने व्यवसायीलाई मात्रै गाली गरेर अर्थतन्त्र सुधारको जिम्मेवारी पूरा हुन नसक्ने बताए ।

उनले घरजग्गा कारोबारमा भएको समस्या समाधान निजी क्षेत्र र सरकारको साझा विषय भएकाले सबै मिलेर समाधान गर्न जरुरी देखिएको उल्लेख गरे ।