काठमाडौं । प्रधानमन्त्री केपी शर्मा ओलीले संविधान संशोधनका लागि गृहकार्य भइरहेको बताएका छन् । शुक्रबार प्रतिनिधिसभाको बैठकमा प्रधानमन्त्री ओलीले अन्य दललाई पनि संशोधनको गृहकार्यमा लाग्न आग्रह गरे ।

संविधान निर्माणको एक दशक पुगेको भन्दै ओलीले यसमा रहेका कमजोरीलाई अभ्यास र अनुभवका आधारमा सुधारका लागि तयार रहन आग्रह गरे ।

“हामीले सुरुदेखि भन्दै आएका छौँ, संविधान देश र जनताको विकासका लागि साधन हो, साध्य होइन र संविधान असंशोधनीय विषय पनि होइन,” ओलीले भने, “हामीले यो संविधान बनाएको १० वर्ष भयो, अब यसको रिभ्यू गर्ने बेला आएको छ ।”

उनले संविधान संशोधनको विषय उठाउँदा कतिपयले पश्चगमनको आरोप लगाउन भ्याएको पनि स्मरण गरे । “हामीले यसो भन्दा कतिपयले पश्चगमनको आरोप लगाउन पनि भ्याए,” ओलीले भने, “आज तिनै शक्ति संविधान संशोधन गरेको खै भन्दै हिँडेको देख्दा उहाँहरूलाई पनि यो कुराको महसुस भएछ भनेर खुसी लागेको छ ।”

उनले वर्तमान सरकार संविधान बनेपछि कार्यान्वयनका क्रममा देखापरेका जटिलताको समीक्षा गरेर तदअनुकूलका कानुन निर्माणलाई प्राथमिकतामा राखेको बताए । त्यसकै लागि कांगेस र एमालेले विज्ञ सम्मिलित कार्यदल बनाएको भन्दै संविधानका विषयमा बृहत् छलफलमार्फत कार्यान्वयनका जटिलता पहिचान गर्ने बताए । सरकारमा रहेका र सरकार बाहिर रहेका दलहरूसँगको सदनमा समेत छलफल गरेर संशोधनको प्रक्रिया अघि बढ्ने उनको भनाइ छ ।

“हामी स्पष्ट छौँ, मिलेका कुरामा साझा धारणा बनाइनेछ, नमिलेका विषयमा बहस र छलफल गरिनेछ,” ओलीले भने, “संविधान संशोधन विधेयक ल्याउने काम सरकारको हो । बहस, छलफलबाट साझा धारणा बनाइनेछ । त्यसैका आधारमा संशोधन प्रस्ताव गरिनेछ ।”