काठमाडौं । प्रधानमन्त्री केपी शर्मा ओलीले ८० को दशकलाई समृद्धिको बनाउन प्रस्ताव गरेका छन् । संघीय संसद्को हिउँदे अधिवेशनअन्तर्गत प्रतिनिधिसभाको पहिलो बैठकमा शुक्रबार उनले समृद्धि हासिल गर्ने अभियानमा सहकार्य गर्न दलहरूलाई आग्रह गरे ।

“सभमुख मोहदय,  यस सदनमा मैले दिल खोलेर आफ्नो कुरा राखेको छु । म चाहन्छु, ८० को दशक हाम्रासामु समृद्धिका लागि सहकार्यको दशक बनोस्,” प्रधानमन्त्री ओलीले भने, “अबको दशकलाई दिगो आर्थिक विकास, समृद्धि र सामाजिक रूपान्तरणतर्फको यात्रा तय गर्ने अवसका रूपमा लिन सकौँ ।”

उनले ८० को दशक समृद्धिमा केन्द्रित रहने बताए । “०४६ सालपछि हामीले तीन दशक बितायौँ । ०५० को दशक अन्योलमा बितायौँ, यसलाई बहुदलीय व्यवस्थाविरुद्ध हिंसाको दशक पनि भन्न सकिन्छ । यो दशक राजनीतिक अस्थिरता, गन्जागोल र अन्योलले भरिएको दशक थियो,” उनले भने, “०६० को दशकलाई गणतन्त्र स्थापना र संक्रमणकालको दशक भन्न सकिन्छ । यो दशकले नयाँ संविधान निर्माणको प्रयास गर्‍यो ।”

उनले ०७० को दशक संक्रमणको अन्त्य, संविधान निर्माण तथा समृद्धिको आधार निर्माणको दशक भएको बताए । “यस दशकमा भूकम्प र नाकाबन्दीले सिर्जना गरेका बाधाहरू पन्छाउँदै संविधान कार्यान्वयन गर्ने कानुनहरू बनाउने र दूरगामी महत्त्वका पूर्वाधार निर्माणका काम भए,” उनले भने, “संविधान कार्यान्वयन गर्ने, भूकम्पपछिको पूर्वाधार निर्माण गर्ने, स्थायित्व कायम राख्ने र शान्ति प्रक्रियालाई संस्थागत गर्ने दशकको रूपमा यसलाई लिन सकिन्छ ।” 

प्रधानमन्त्री ओलीले ०८० को दशकलाई खेर नफाल्न आग्रह गरे । यसलाई समृद्धिको दशक बनाउन स्थिरता दिनुपर्ने उनको भनाइ थियो ।

उनले समृद्धि हासिल गर्न र तीव्र गतिमा अघि बढ्न ऐन र कानुनलाई जहाँ जे आवश्यक हुन्छ, त्यो संशोधन गर्दै सुधार गरेर जानुपर्ने बताए । संविधानका आवश्यक सुधारमा पनि गलत व्यारख्या नगर्न उनले दलहरूलाई आग्रह गरे ।

पूर्णपाठ पढ्नोस्–