काठमाडौं । नेपाल लोकतान्त्रिक खेलकुद संघ महाधिवेशन निर्देशन समितिको आयोजनामा बिहीबारबाट काठमाडौंमा सभापति कप फुटबल प्रतियोगिता सुरु हुँदै छ ।

त्रिपुरेश्वरस्थित दशरथ रंगशालामा आयोजना हुने सभापति कप बिहीबार सुरु भइ माघ १७ गते सम्पन्न हुने आयोजकले जनाएको छ ।

प्रतियोगितामा आयोजकका तर्फबाट वाग्मती प्रदेशसहित मच्छिन्द्र क्लब, एपीएफ क्लब, नेपाल पुलिस क्लब, एनआरटी, संकटा क्लब, फ्रेन्ड्स क्लब, ब्वाइज युनाइटेड र संकटा क्लब सहभागी छन् ।

सभापति कपको पूर्वसन्ध्यामा बुधबार रंगशालामा आयोजित प्रि–म्याच कन्फ्रेन्समा प्रतियोगितामा सहभागी टिमले आफूहरू उपाधि दाबेदारीका साथ मैदान उत्रने जनाएका हुन् । प्रतियोगिताको उद्घाटन खेलमा बिहीबार ब्वाइज युनाइटेड र संकटा क्लबबीच प्रतिस्पर्धा हुनेछ ।

त्यस्तै माघ ११ गते मच्छिन्द्र र एपीएफ क्लब, माघ १२ गते नेपाल पुलिस क्लब र नेपाल लोकतान्त्रिक खेलकुद संघ वाग्मती प्रदेशबीच तथा माघ १३ गते एनआरटी र फ्रेन्ड्स क्लबबीच खेल हुने आयोजकले जनाएको छ । माघ १४ र १५ गते सेमिफाइनल तथा माघ १७ गते फाइनल खेल हुने छ । प्रतियोगिताको विजेताले २६ लाख तथा उपविजेता टोलीले १३ लाख पुरस्कार पाउने नेपाल लोकतान्त्रिक खेलकुद संघ महाधिवेशन निर्देशन समितिले जनाएको छ ।