काठमाडौं । धितोपत्र दोस्रो बजार मापक नेप्से परिसूचक ५२.३६ अंकले बढेको छ । आज नेप्से परिसूचक २ प्रतिशतले बढेर २,६६५.४५ विन्दुमा बन्द भएको हो ।

आज कारोबार रकम तीन अर्बले बढेको छ । नेपाल स्टक एक्सचेन्ज नेप्सेका अनुसार, आज नौ अर्ब २० करोड ३० लाख रुपैयाँको सेयर खरिदबिक्री भएको छ । यो साढे एक महिनापछिको उच्च मूल्यको सेयर कारोबार हो ।

गत मंसिर १९ गते नौ अर्ब १३ करोड २४ लाख रुपयाँको सेयर खरिदबिक्री भएको थियो । तर, त्यसयता नौ अर्ब रुपैयाँको सेयर खरिदबिक्री भएको थिएन ।

आज १९६ कम्पनीको सेयरमूल्य बढेको छ । यस्तै, ३७ कम्पनीको सेयरमूल्य घटेको छ । नौ कम्पनीको सेयरमूल्य स्थिर छ ।

कर्पाेरेट डेभलपमेन्ट बैंक र डोल्टी पावर कम्पनीको सेयरमूल्य १० प्रतिशतले वृद्धि भएको छ । तर, बलेफी हाइड्रोपावरको सेयरमूल्य ८.२१ प्रतिशतले घटेको छ ।

आज कारोबारमा आएका १३ वटै समूहको परिसूचक बढेको छ । सर्वाधिक वृद्धि ‘अन्य’ समूहको भएको छ । यस समूहको परिसूचक ४.२४ प्रतिशतले बढेको छ । लगानी समूहको परिसूचक ३.८२ प्रतिशतले वृद्धि भएको छ ।