काठमाडौं । कप्तान रुविना क्षेत्रीको अर्धशतकमा कोसी प्रदेशले कैलालीमा जारी प्रधानमन्त्री कप महिला क्रिकेट प्रतियोगितामा मधेस प्रदेशमाथि सहज जित निकालेको छ ।

कोसी लगातार आफ्नो दोस्रो खेलमा विजयी भएको हो । आज भएको खेलमा कोसीले मधेस प्रदेशलाई ४७ रनले पराजित गरेको हो ।

धनगढीस्थित फाप्ला मैदानमा आज भएको दोस्रो खेलमा कोसीले दिएको १०७ रनको लक्ष्य पछ्याएको मधेसले निर्धारित २० ओभरमा ९ विकेटको क्षतिमा ५९ रन मात्रै बनाउन सक्यो । मधेसका लागि प्रतिमा शाहले सर्वाधिक १७ रन जोडिन् । अन्य ब्याटरले दोहोरो अंकमा रन बनाउन सकेनन् । बलिङतर्फ कोसीका लागि कप्तान क्षेत्रीले तीन तथा अलिशा खडिया र ज्योति दनुवारले दुई–दुई विकेट लिइन् ।

यसअघि टस जितेर पहिला ब्याटिङ गरेको कोसीले २० ओभरमा पाँच विकेटको क्षतिमा १०६ रन बनाएको थियो । कोसीका लागि कप्तान क्षेत्रीले अर्धशतकीय पारी खेल्दै ५७ रन बनाइन् । यस्तै, टिका शाहले २१ रन बनाइन् ।

बलिङतर्फ मधेसका लागि प्रतिमा साहले दुई विकेट हात पारिन् । कोसीकी कप्तान रुविना प्लेयर अफ दी म्याच भइन् ।

कोसीले यसअघि पहिलो खेलमा वाग्मती प्रदेशलाई हराएको थियो । जितसँगै समूह ‘बी’ मा रहेको कोसी चार अंकका साथ तालिकाको शीर्ष स्थानमा उक्लिएको छ ।