काठमाडौं । इंग्लिस प्रिमियर लिगमा साविक विजेता म्यानचेस्टर सिटीले इप्सविच टाउनविरुद्ध उसैको मैदानमा ६–० को फराकिलो जित निकालेको छ ।

आइतबार राति पोर्टमन रोडमा भएको खेलमा फिल फोडेनले दुई गोल गरे । माटेओ कोभासिच, जेरेमी डोकु, एर्लिङ हाल्यान्ड र जेम्स म्याकएटीले गोल गरे ।

सिटीले पहिलो हाफमा तीन र दोस्रो हाफमा तीन गोल गरेको हो । जितसँगै २२ खेलबाट ३८ अंक जोडेको सिटी तालिकाको चौथो स्थानमा उक्लिएको छ । सिटी अझै पनि शीर्ष स्थानको लिभरपुलभन्दा १२ अंकले पछि छ । 

समान खेलबाट १६ अंक जोडेको इप्सविच भने रेलिगेसन क्षेत्रमा छ । 

आइतबार राति नै भएको अर्को खेलमा म्यानचेस्टर युनाइटेडले भने घरमै पराजय व्यहोरेको छ । ओल्ड ट्राफोर्डमा भएको खेलमा युनाइटेडलाई ब्राइटनले ३–१ ले पराजित गरेको हो ।

खेलको पाँचौँ मिनेटमा यान्कुबा मिन्तेहले गोल गर्दै ब्राइटनलाई अग्रतामा राखेका थिए । २३औँ मिनेटमा ब्रुनो फर्नान्डेजले पेनाल्टीमा गोल गर्दै युनाइटेडलाई खेलमा फर्काएका थिए । 

तर, ६०औँ मिनेटमा काओरु मितोमाले गोल गर्दै ब्राइटनलाई पुनः २–१ को अग्रतामा राखे । यस्तै, ७६औँ मिनेटमा जर्जिना रुटरले गोल गरेसँगै ब्राइटनले ३–१ को जित पक्का गरेको हो ।

जितसँगै २२ खेलबाट ३४ अंक जोडेको ब्राइटन तालिकाको नवौँ स्थानमा उक्लिएको छ । समान खेलबाट २६ अंक जोडेको युनाइटेड तालिकाको १३औँ स्थानमा छ ।