अस्ट्रेलिया । नेपाली राजनीतिमा चिरपरिचित रहेकी चित्रलेखा यादव अस्ट्रेलियाका लागि नेपाली राजदूत बनेर यसको राजधानी क्यानबेरा आइपुगेकी छिन् । सिड्नी विमानस्थलमा एनएसडब्लू राज्यका वाणिज्यदूत सञ्जीव शर्मालगायतले नवनियुक्त राजदूत यादवलाई स्वागत गरेका छन् ।

विमानस्थलमा जनसम्पर्कका कृष्ण गिरीलगायत समुदायका अगुवाको उपस्थिति थियो । राजदूत यादवले फेब्रुअरीको पहिलो आहोदाको प्रमाणपत्र बुझाउने कार्यक्रम रहेको छ ।

यादवले राजनीतिमा कूटनीति बुझेको मान्छेले परराष्ट्र नीति पनि बुझ्ने भएकाले यसलाई सहज रूपमा अगाडि बढाउन सक्ने धारणा राखिन् । ‘‘मेरो पहिलो प्राथमिकता  कूटनीतिक सेवा सहज र सरल बनाउनुका साथै दुई देशबीचको आपसी सम्बन्ध प्रगाढ बनाउनु हो, त्यसमा लाग्नेछु,’’ राजदूत यादवले बताइन् । 

अस्ट्रेलिया गएपछि आफ्नो पहिलो प्राथमिकता दुई देशको उच्चस्तरीय राजनीतिक भ्रमण, विद्यमर्थीका समस्या र आपसी सम्बन्ध विस्तार गराउनु रहेको बताइन्। ‘‘अस्ट्रेलिया र नेपालको बीचमा अहिलेसम्म उच्चस्तरीय राजनीतिक भ्रमण भएको छैन,’’ यादवले भनिन्,‘‘प्रधानमन्त्री, मन्त्रीस्तरीय भ्रमण गराउने प्रयास गर्नेछु ।’’
 
नेपालका लागि महत्त्वपूर्ण मुलुकका रूपमा अस्ट्रेलिया रहेको भन्दै उनले उच्चस्तरीय भ्रमणले दुई देशबीचको समझदारी र सहयोगको वातावरण बनाउन भूमिका खेल्ने बताइन्् । सम्बन्ध प्रगाढ भएपछि आफैँ सहयोग र सद्भावको वातावरण बन्ने यादवको तर्क थियो ।
 
नेपाल र नेपालीको हितमा काम गर्नु दूतावासको मूल कर्तव्य रहेको उनले सुनाइन् । ‘‘सन् २००७ मा नेपाली दूतावास स्थापना हुँदै गर्दा अस्ट्रेलियामा थोरै नेपाली थिए, तर अहिले लगभग लाखमा पुगिसकेको छ । तर दूतावासमा कर्मचारी  संख्या बढेको छै,’ उनले भनिन्, ‘‘यस्तो अवस्थामा कसरी सीमित स्रोत र साधनले चुस्त दुरुस्त सेवा दिन सकिन्छ भनेर प्रयास गर्ने छु ।’’

त्यहाँको कन्सुलर सेवालाई चुस्त दुूरुस्त र प्रभावकारी बनाउने आफ्नो प्रयास हुने उनले बताइन् । उनले भनिन्, ‘मैले कन्सुलर सेवालाई प्रभावकारी बनाउन कसरी सकिन्छ भनेर वाणिज्यदूतहरूसँग छलफल गर्नेछु । स्थानीय समस्या पनि सुन्छु, अनि कसरी अगाडि बढ्न सकिन्छ मिलेर अगाडि बढ्ने प्रयास गर्नेछु ।’

आफूले विद्यार्थीका डिप्रेसन र आत्महत्याका विषयमा पनि सुनेको भन्दै उनले शव स्वदेश लैजाने विषयमा पनि सबै समुदायसँग छलफल अगाडि बढाउने बताइन् । 

सुशील कोइराला नेतृत्वको सरकारमा शिक्षामन्त्री बनेकी यादव नेपाली कांग्रेसको कोषाध्यक्ष समेत भइसकेकी छिन्। पटक–पटक केन्द्रीय सदस्य बनेकी यादवको मूल थलो सिरहा हो ।