काठमाडौं । नेपाल कबड्डी लिग (एनकेएल)को पहिलो खेलमा काठमाडौं म्याभरिक्सले पोखरा लेकर्सविरुद्ध रोमाञ्चक जित निकालेको छ ।

शुक्रबार त्रिपुरेश्वरस्थित राष्ट्रिय खेलकुद परिषद् (राखेप) कभर्ड हलमा भएको खेलमा धनश्याम रोक्का मगरको कप्तानीमा रहेको काठमाडौंले पोखराविरुद्ध ४२–४१ को रोमाञ्चक जित निकालेको हो ।

प्रतियोगिताको पहिलो खेलमै जित निकालेको काठमाडौंले पाँच अंक जोडेको छ । हारका बाबजुद पोखरा एक अंक पाएको छ । प्रतियोगितामा सात अंकभन्दा कम अन्तरले पराजित हुने टिमले एक अंक प्राप्त गर्नेछ ।

प्रतियोगिताको पहिलो संस्करणमा कुल ६ टिमको सहभागिता छ । जसमा काठमाडौं, पोखरासँगै जनकपुर नाइट्स, हिमालयन रेडर्स, धनगढी वाइल्डक्याट्स र विराटनगर ब्यान्डिट्सबीच प्रतिस्पर्धा हुनेछ ।