काठमाडौं । प्रधानमन्त्री केपी शर्मा ओलीलाई नेकपा (एकीकृत समाजवादी)का अध्यक्ष माधवकुमार नेपालले वर्तमान सरकार ०८७ सालसम्म किन टिकाउनुपर्‍यो ? भन्दै प्रश्न गरेका छन् । शुक्रबार विपक्षी दलहरूको संयुक्त पत्रकार सम्मेलनपछि सञ्चारकर्मीसित उनले ०८७ मा संविधान संशोधन गर्ने भन्ने प्रधानमन्त्रीको अभिव्यक्तिप्रति आपत्ति जनाउँदै प्रश्न गरेका हुन् ।

नेता नेपालले सरकार असफल भएको जिकिर गरे । “वास्तवमा यो सरकारले जनअपेक्षाहरू पूरा गर्न सकेको छैन । यो सरकार जनतालाई सुशासन दिन सकेको छैन, रोजगारी प्रवर्द्धन गर्न सकेको छैन, उत्पादन बढाउन सकेको छैन । समाजमा सकारात्मक सन्देश दिन सकेको छैन । त्यसैले यो सरकार असफल छ । अहिले सरकारको काम र क्रियाकलाप सन्तोषजनक छैन । सबै क्षेत्रमा यसको काम अत्यन्तै अलोकतान्त्रिक छ । संविधानलाई पूर्ण रूपमा बेवास्ता गरेको छ,” उनले भने, “संविधान संशोधन गर्नेजस्तो विषयमा अरू कुनै पार्टीसँग परामर्श नगरी रातारात संविधान संशोधन नगरी नहुने के थियो विषय र अहिलेसम्म किन अघि बढेन, अब ०८७ सम्म कुर्नुपर्ने ? यो सरकारलाई २०८७ सम्म टिकाइराख्नुपर्‍यो ? प्रधानमन्त्रीलाई टिकाइराख्नुपर्ने ? यसको जवाफ दिनुपर्‍यो ।”

उनले सरकारका कामको आलोचना गर्नु अर्को विकल्पमा जान तयार छौँ भन्ने नरहेको बताए । सरकारले सदनलाई बेवास्ता गरेको खण्डमा विपक्षी दलहरूले सडक संघर्ष गर्ने उनको भनाइ छ ।