काठमाडौं । भारतमा इन्डियन प्रिमियर लिग क्रिकेटपछिको सर्वाधिक लोकप्रिय प्रतियोगिता हो प्रो कबड्डी लिग । जसको फाइनलमा पछना पाइरुेट्सलाई पराजित गर्दै दुई साताअघि हरियणा स्टिलर्स च्याम्पियन भएको थियो ।

यिनै प्रो कबड्डी लिग च्याम्पियन हरियणाका रेइडर्स हुन् घनश्याम रोकामगर । उनी नेपाली राष्ट्रिय पुरुष कबड्डी टिमका कप्तान पनि हुन् । २१ वर्षीया उनी हाल नेपाल कबड्डी लिग (एनकेएल) खेल्न काठमाडौं आइपुगेका छन् । उनी माघ ४ गतेदेखि हुने एनकेएलमा काठमाडौं माभरिक्सका मार्की खेलाडी हुन् ।

फ्रेन्चाइज टिमको अवधारणामा पहिलोपल्ट आयोजना गर्न लागिएको एनकेएलप्रति घनश्याम निक्कै उत्साहित छन् । लिबाङ, रोल्पा घर भएका उनले सोमबार आयोजित कार्यक्रममा भने, "नेपालमा यस्तो (एनकेएल) प्रतियोगिता पहिला कहिल्यै भएको थिएन । यसपालि खेलाडीले राम्रो पैसा पाउँदैछन् । कर्पोरेट हाउसहरूले टिम खरिद गरेका छन् । खेलाडी, कोच सबैले राम्रो सुविधा पाएको छ । त्यसैले एनकेएलले नेपाली कबड्डीलाई व्यावसायिक रूपमै स्थापित गर्ने र भविष्यमा ठूलो प्रतियोगिताको रूपमा स्थापित हुने विश्वास लिएको छु ।"

गत सिजन पनि हरियणा स्टिलर्सबाटै खेल्दा उनी प्रो कबड्डी लिगमा उपविजेता बनेका थिए । यसपटक भने च्याम्पियन नै भएका हुन् । पुनामा जितेको उपाधिको खुसीयाली हरियणामा बनाएर उनी स्वदेश फर्किएका हुन् ।

एस्ट्रोनिक्स म्यानेजमेन्टद्वारा आयोजित एनकेएलको माघ ४ गते हुने उद्घाटन खेलमा काठमान्डु माभरिक्स र पोखरा लेकर्स भिड्दैछन् । विराटनगर ब्यान्डिट्सले पहिलो खेलमा धनगढी वाइल्डक्याट्सको सामना गर्नेछ । जनकपुर नाइट्सले बुटवलको हिमालयन रेइडर्सविरुद्ध प्रतिस्पर्धा गर्दै एनकेएलमा डेब्यु गर्नेछ ।

६ सहरका ६ टिम सहभागी एनकेएलको राउन्ड रोबिन लिगमा १५ खेल हुनेछ, जसको शीर्ष चार टिम नकआउट चरणमा प्रवेश गर्नेछन् । लिगका शीर्ष दुई टिमले माघ १४ गते क्वालिफाइर १ खेल्नेछ, जसको विजेता सीधै फाइनलमा पुग्नेछ ।

लिगमा तेस्रो र चौथो स्थानमा रहेका टिमले माघ १४ गते नै इलिमिनेटरमा खेल्नेछ, जसको विजेता क्वालिफाइर २ मा पुग्नेछ । क्वालिफाइर १ मा पराजित भएका टिम र इलिमिनेटरका विजेतावीच माघ १६ गते हुने क्वलिफाइर २ मा जित हासिल गर्ने टिमले फाइनलमा स्थान पाउनेछ । फाइनल माघ १८ गते हुनेछ । एनकेएल खेल्न थाइल्यान्ड, बंगलादेश र श्रीलंकाबाट १८ खेलाडी पनि काठमाडौं आइसकेका छन् ।