काठमाडौं । नेकपा (माओवादी केन्द्र)का उपमहासचिव शक्तिबहादुर बस्नेतले पश्चिम नेपालमा गएको भूकम्पबारे वर्तमान सरकार गम्भीर नभएको आरोप लगाएका छन् । आइतबार सिंहदरबारमा बसेको विपद् जोखिम न्यूनीकरण तथा व्यवस्थापन राष्ट्रिय परिषद्को १६औँ बैठकपछि सञ्चारकर्मीहरूसँग कुरा गर्दै उनले यस्तो बताएका हुन् ।

जाजरकोटलगायत पश्चिम नेपालको भूकम्प र विपद् व्यवस्थापनसँग अघिल्लो सरकारले गरेका निर्णयहरूको प्रभावकारी कार्यान्वयन गर्न सरकारसँग आग्रह गरेको बताएका छन् । उनले बैठकमा समस्याका बारेमा चर्चा गरेको र पक्ष, प्रतिपक्ष नभइ विपद् जोखिम न्यूनीकरण तथा विपद् व्यवस्थापनका बारेमा चर्चा गरेको उल्लेख गरे ।

जनसरोकारका विषय र तत्कालीन आवश्यकताका विषयहरूलाई गम्भीरताका साथ उठाएको उल्लेख गरे । अघिल्लो सरकारले पश्चिम नेपालको भूकम्पपीडितलाई दिने भनेको राहतबारे अहिलेको सरकार पछाडि फर्किन खोजेको महसुस आफूले गरेको बताए । पुनर्निर्माणको लागि पाँख लाख रुपैयाँ प्रतिपरिवारलाई दिने निर्णय भएकोमा त्यसलाई घटाउन खोजिरहेको जस्तो महसुस गरेको बताए ।

"हामीले समस्याहरूको बारेमा चर्चा गर्‍यौँ । यो पक्ष, प्रतिपक्षभन्दा विपद् जोखिम न्यूनीकरण तथा विपद् व्यवस्थापन राष्ट्रिय परिषद्को बैठक हो । त्यो विषयमा जनसरोकारका विषयहरू र तत्कालीन आवश्यकताका विषयहरूमा गम्भीरतापूर्वक यो कुरा उठाएका छौँ," उनले भने, "केही विषयहरूमा जुन गम्भीरताका साथ सरकार प्रस्तुत हुनु पर्दथ्यो, त्यो गम्भीरता हामीले महसुस गरेनौँ । यसमा सरकार गम्भीर बनोस् । विगतका सरकारले लिएका निर्णयहरूको प्रभाकारी कार्यान्वयन गरोस् भन्ने सुझाव दिएका छौँ ।"