काठमाडौं । खाली सिसी बोतल तपाईंहरूले सामान्यतया के–केमा गर्न प्रयोग गर्न सक्नुहुन्छ ? पानी खान, मरमसला राख्न, दाल राख्न, अचार राख्न, पेयपदार्थ राख्न, गमलाको रूपमा प्रयोग गर्नलगायत काममा प्रयोग गर्नुहुन्छ होला । 

तर, ललितपुरको पाटनका स्थानीय विभूषण ताम्राकारले भने बोलतभित्र अनौठा कलाकृति बनाउन प्रयोग गर्दछन् । ताम्राकारले खाली सिसी बोतलभित्र काठमाडौं उपत्यका विविध सांस्कृतिक, पुरातात्त्विक र विश्व सम्पदा सूचीभित्र पर्ने सम्पदालगायत सुन्दर कलाकृति उतारेका छन् । 

उनले काठमाडौंको सिंहदरबार, घण्टाघर, रानीपोखरी मन्दिर, सहिदगेट, ललितपुरको प्रख्यात कृष्णमन्दिर, त्यसैगरी जनकपुरको ऐतिहासिक जानकी मन्दिर, पुराना डुंगा, नाउँलगायत धार्मिक, ऐतिहासिक, पुरातात्त्विक महत्त्वका सम्पदा बोतलभित्र दुरुस्तै बनाएका छन् । सानैदेखि कला आर्टमा लोभिएका ताम्राकार यतिवेला कलालाई फरक तौरतरिकाबाट बनाउन सकिन्छ भनेर लागिपरेका हुन्छन् ।

कलाकार ताम्राकारले लामो समयदेखि बनाएका सिसी बोतलभित्र बनाएका कलाकृति नेपाल ललितकला प्रज्ञा–प्रतिष्ठान, समसामयिक चित्रकला विभाग र हस्तकला शिल्पकला विभागले पुस १५ देखि २६ गतेसम्म नक्साल रहेको प्रतिष्ठानको अरनिको प्रदर्शनी कक्षमा प्रदर्शनी गरिएको थियोे । 

कलाकार विभूषण ताम्राकारले खाली सिसी बोतलभित्र  बनाएका अद्भूत कलाकृति जस्ताको त्यस्तै तस्बिरमा हेर्नुस् ।