काठमाडौं । नेकपा (एकीकृत समाजवादी)का अध्यक्ष माधवकुमार नेपालले प्रधानमन्त्री केपी शर्मा ओली ६ वर्ष नै प्रधानमन्त्री रहन चाहेकी हो कि भन्ने आशंका गरेका छन् ।

शुक्रबार सिंहदबारमा नेकपा (मओवादी केन्द्र)का अध्यक्ष पुष्पकमल दाहाल 'प्रचण्ड' र राष्ट्रिय प्रजातन्त्र पार्टीका अध्यक्ष राजेन्द्र लिङ्देनबीचको भेटपछि उनले ओली संविधान संशोधनबाट पछि हटेको सुनिएको बताए ।

“संविधान संशोधनका कुराबाट वर्तमान सरकारका प्रधानमन्त्री पछि हटनुभयो भन्ने सुनिन्छ । कति साँचो हो कति साँचो होइन । जानकारी भएन । मिडिया पढेर धारणा बनाउने स्थिति बन्छ,” उनले भने ।

उनले ०८७ सम्म प्रधानमन्त्री हुने ओलीको चाहना रहेको हुनसक्ने बताए । “०८७ सम्म बस्ने उहाँको चाहना होला । हेरौँ, चुनावै नगरी बस्ने हो कि । संसद् नै भंग गर्ने मान्छेले ठेलेको ठेल्यै गरेर अर्को ६ वर्ष बसौँला भन्ने सोच्नुभएको छ कि । थाहा भएन्,” नेपालले भने ।

ओलीले पुस २३ गते केन्द्रीय कमिटी बैठकमा संविधान संशोधन ०८७ मा हुने धारणा राखेपछि राजनीतिक वृत्त तरंगित बनेको छ । उनले संविधान संशोधनका विषयमा आफ्नो पार्टीले कार्यदल बनाइसकेको बताए ।

विपक्षी दलहरूबीच संविधान संशोधनका विषयमा छलफल हुने पनि बताए । “के–के विषयमा सत्ताधारी पक्षले सोचिरहेका छन् । त्यसमा पनि छलफल गरौँला,” उनको भनाइ छ ।