काठमाडौं । कुशल भुर्तेलको अलराउन्डर प्रदर्शनप्रेरित विभागीय टोली नेपाल पुलिस क्लबले मोफसलमा जारी जय ट्रफी पुरुष इलाइट कपको आफ्नो दोस्रो खेलमा मधेस प्रदेशविरुद्ध फराकिलो जित निकालेको छ ।

बुधबार र बिहीबार पर्साको विरगञ्जस्थित नारायणी क्रिकेट मैदानमा भएको खेलमा पुलिसले मधेसविरुद्ध एक इनिङ र ३५ रनको जित निकालेको हो ।

खेलको पहिलो दिन पहिले ब्याटिङमा आएको मधेसले १२९ रन बनाएको थियो । पहिलो दिन जवाफी ब्याटिङमा आएको पुलिसले पहिलो इनिङमा २५८ रन बनाउँदै १२९ रनको अग्रता लिएको थियो ।

बिहीबार दोस्रो इनिङमा ब्याटिङका निम्ति आएको मधेस ९४ रनमै समेटिएपछि पुलिसले एक इनिङ बाँकी छँदै जित निकालेको हो ।

बिहीबार मधेसका विशाल पटेलले सर्वाधिक २७ रन बनाए । मयन यादवले २२ रन थप्दा हिमांशु दत्तले १७ रन जोडे । यसबाहेक, मधेसका अन्य ब्याटर दोहोरो अंकसम्म पुग्न सकेनन् ।

मधेसलाई सस्तैमा रोक्न पुलिसका कुशल भुर्तेलले दोस्रो इनिङमा पाँच विकेट लिए । ४.२ ओभर बलिङ गरेका कुशलले २२ रन खर्चिए । यसअघि कुशलले पहिलो इनिङमा दुई विकेट लिएका थिए ।

पहिलो इनिङमा ब्याटिङतर्फ पुलिसका निम्ति कुशलले अर्धशतक समेत बनाएका थिए । उनले ६८ बलमा १० चौकासहित ६३ रन बनाएका थिए ।

प्रतियोगितामा पुलिसको यो पहिलो जित हो । पुलिस यसअघि पहिलो खेलमा अर्को विभागीय टोली त्रिभुवन आर्मी क्लबसँग बराबरीमा रोकिएको थियो ।

यता, मधेसको भने यो पहिलो हार हो । यसअघि मधेस र वाग्मती प्रदेशबीच भएको पहिलो खेल बराबरीमा टुंगिएको थियो ।