विराटनगर । घरमै राखेकी नाबालिकालाई पटक पटक बलात्कार गरेको आरोप लागेका झापाको बिर्तामोड नगरपालिकाका पूर्वमेयर ध्रुवकुमार शिवाकोटीलाई पुर्पक्षका लागि जेल पठाउन अदालतले आदेश दिएको छ ।

उनीमाथि १५ वर्षीया नाबालिकालाई बलात्कार गरेको आरोप छ । शिवाकोटी नेकपा एमालेको कोसी प्रदेश कमिटी सदस्य पनि हुन् । सोमबार जिल्ला अदालत झापाका न्यायाधीश नवीनकुमार जोशीको इजलासले शिवाकोटीलाई पुर्पक्षका लागि जेल पठाउने आदेश दिएको हो । अदालतका स्रेस्तेदार किरणकुमार सिंहले थुनामा राखेर अनुसन्धान गर्न अदालतले आदेश दिएको बताए ।

घरेलु कामदारको रूपमा राखिएकी नाबालिकालाई जबरजस्ती पटक पटक करणी गरेको आरोपमा मंसिर २४ गते उनी पक्राउ परेका थिए । तर, बिरामी भएको भन्दै बीएण्डसी अस्पतालमा भर्ना भएका थिए ।

भारतको आसाम घर भएकी पीडित बालिका बुबाआमाको निधनपछि बिर्तामोडमा हजुरआमासँग बस्दै आएकी थिइन् । उनैले नेपाल ल्याएर भरणपोषण गर्दै आएकोमा पछि पीडित ‘अनारमनी २१ (नाम परिवर्तित)लाई संरक्षण गरेर पढाइ दिने भन्दै पूर्वमेयरले जिम्मा लिएका थिए । तर, घरमा कोही नभएको मौकामा पटक पटक जबरजस्ती करणी गर्न थालेपछि बालिका काकरभिट्टा नाका हुँदै आसाम फर्कन लाग्दा प्रहरीले उद्धार गरेको थियो । त्यसपछि घटनाबारे प्रहरीलाई बताएकी थिइन् ।

शिवाकोटीलाई १२ देखि १४ वर्षसम्म कैद सजायको मागसहित अदालतमा मुद्दा दायर भएको छ ।