काठमाडौं । चीनले अमेरिकाको अर्थ मन्त्रालयमा भएको साइबर आक्रमणमा आफ्नो हात रहेको आरोप निराधार भएको जवाफ फर्काएको छ । अमेरिकी अर्थ मन्त्रालयले उक्त घटनामा चिनियाँ राज्य सञ्चालित ह्याकरको हात रहेको आरोप लगाएको थियो ।

यस विषयमा अमेरिकाको अर्थ मन्त्रालय वा ट्रेजरी डिपार्टमेन्टले सोमबार सांसदहरूलाई पत्राचार गरेको थियो । ह्याकरहरूले आफ्नो प्रणालीको केही भाग र ननक्लासिफाइड कागजातमा पहुँच पुर्‍याएको ट्रेजरी डिपार्टमेन्टले पत्रमा उल्लेख गरेको छ ।

अमेरिकी सिनेटको बैंकिङ समितिलाई लेखेको पत्रमा ट्रेजरीले घटनामा चीनको राज्य प्रायोजित एडभान्स पर्सिस्टेन्ट थ्रेट (एपीटी)को हात हुनसक्ने देखिएको भनेको थियो ।

मंगलबार चीनको परराष्ट्र मन्त्रालयले बेइजिङले सबै प्रकारका ह्याकर आक्रमणको सधैँ विरोध गरेको बताएको हो ।

मन्त्रालयकी प्रवक्ता माओ निङले ‘चीनविरुद्धमा राजनीतिक उद्देश्यका गलत सूचना फैलाउनेको झनबढी विरोध गर्ने’ बताएकी छन् ।