काठमाडौं । नेपाली कांग्रेसका नेता कृष्णप्रसाद सिटौलाले जनताका समस्या समाधान गरी बलियो नेपाल निर्माण गर्न आवश्यक रहेको बताएका छन् । मंगलबार काठमाडौंमा राष्ट्रिय मेलमिलाप दिवस एवं पार्टीको सयदिने विशेष अभियान समापन कार्यक्रममा उनले यस्तो बताएका हुन् ।

जनताको आर्थिक प्रगति हालको आवश्यकता भएको उनले उल्लेख गरे । उनले पछाडि परेका जनतालाई अगाडि ल्याउनुपर्ने, दलित, महिलाका समस्या समाधान गरेर मुलुकलाई आर्थिक प्रगतिका पक्षमा कांग्रेसले डोर्‍याउनुपर्ने बताए ।

“जनताका तमाम समस्यालाई समाधान गरेर बलियो नेपाल निर्माण गर्नु छ । गरिब जनताको आर्थिक प्रगति गर्नु छ । पछाडि परेका जनतालाई अगाडि ल्याउनु छ,” उनले भने ।

कांग्रेस र नेकपा (एमाले) मिलेर संयुक्त सरकार बनाइएको र प्रधानमन्त्रीमा केपी शर्मा ओली रहे पनि यसको नीतिगत नेतृत्व कांग्रेसले गरिरहेको उनले बताए । “...ठूलाठूला पार्टीहरू कांग्रेस र एमाले मिलेर संयुक्त सरकार बनाएका छौँ । प्रधानमन्त्री केपी ओलीजी हुनुहुन्छ । तथापि, हामी गर्वका साथ भन्छौँ– नीतिगत नेतृत्व नेपाली कांग्रेसले गरिरहेको छ ।”

उनले अगाडि भने, “राज्य सञ्चालनको नेतृत्व प्रधानमन्त्रीले गर्नुभएको होला, तर नेपालको समग्रमा नेपाली जनतालाई अघि बढाउने नीतिगत नेतृत्व नेपाली कांग्रेस पार्टीले गरिरहेको छ ।”

नेता सिटौलाले कांग्रेसले सबै राजनीतिक दलहरूलाई एकाकार गरेर राष्ट्रिय मेलमिलाप निर्माण गरी अघि बढ्ने बताए । न्युज एजेन्सी नेपाल