काठमाडौं । प्रधानमन्त्री केपी शर्मा ओलीले कोप–३० मा जाँदा भाषण सुनेर फर्किने नभइ निर्णय गराएर आउने गरी तयारी थाल्न निर्देशन दिएका छन् ।

बिहीबार काठमाडौंमा वन तथा वातावरण मन्त्रालयले कोप–२९ को समीक्षाका लागि आयोजना गरेको कार्यक्रमलाई सम्बोधन गर्दै प्रधानमन्त्री ओलीले जलवायु परिवर्तनसम्बन्धी सम्मेलनहरूमा जाँदा भाषण सुन्ने नभइ निर्णय गराउनसक्ने गरी जानुपर्ने बताएका हुन् ।

सम्मेलनका दिइने तीन मिनेटलाई कतिबेला आयो भन्नेकुराको जानकारीबिनै उत्कृष्ट रूपमा आफ्ना धारणा र एजेन्डाहरू प्रस्तुत गर्नुपर्ने बताए । उनले कोप–३० मा जाँदा नेपालले आफूलाई विशेष तयारीका साथ जानुपर्ने उल्लेख गरे । नेपालले जलवायु परिवर्तनसम्बन्धी मुद्दामा नेतृत्व लिन सक्नुपर्ने प्रधानमन्त्रीको भनाइ थियो ।

सबै एकजुट भएमात्रै जलवायु परिवर्तनका समस्या न्यूनीकरण गर्न सकिने उल्लेख गर्दै प्रधानमन्त्री ओलीले जलवायु परिवर्तनसम्बन्धी असर न्यूनीकरणका लागि ठोस नीति बनाउनुपर्ने बताए । कसको जिम्मेवारी के ? कसले के गर्ने ? भनेर सरकारले समिति बनाउने र समितिको सुझावअनुसार जलवायु अनुकूलनका लागि काम गर्ने बताए । अहिलेदेखि नै कोप–३० को तयारीमा लाग्न निर्देशन दिए ।

कोप २० बाट ३० आउँदासम्म नेपालले गरेका कामहरूको प्रतिवेदन बनाउने र आफ्ना एजेन्डाहरू दृढ र स्पष्ट बनाउनुपर्नेमा जोड दिए । हिमालमा जलवायु परिवर्तनका कारण परेको असरमा नेपालले प्राथमिकता दिनुपर्ने उल्लेख गरे ।

"साझा प्रतिवद्धता सबैभन्दा महत्वपूर्ण कुरा छ । जसमा हामी जानुपर्छ । कोप ३० मा जाँदा विशेष तयारीका साथ जानुपर्दछ । लेक्चर सुनेर आउने होइन, निर्णय गराएर आउने । हामीले लिड गर्नुपर्छ, यी इस्यूहरूमा," प्रधानमन्त्री ओलीले भने, "नेपाल देखिने, सुनिने हुनुपर्छ । नेपाल बुझिने हुनुपर्छ । नेपालले प्रस्तावहरूमार्फत लिड गर्नुपर्छ, इन्भारोमेण्टल क्वेशनमा किनभने यसको मार सबैभन्दा बढी हामीलाई परेको छ । यसको समाधान यहाँबाट खोज्न प्रारम्भ गरिनुपर्दछ । हाम्रा मन्त्रालयहरूले ठोस योजनाहरू बनाउनु पर्दछ ।"

प्रधानमन्त्री ओलीले सीमित स्रोत र साधनका बाबजुत पनि नेपालले सचेतनामूलक कार्यक्रमहरूमार्फत वातावरण सफा राख्नसक्ने बताए । वन जंगलमा डढेलो लाग्न नदिन नागरिकमा सचेतना फैल्याउन आवश्यक रहेको उल्लेख गरे ।