काठमाडौं । अल्बानियाका प्रधानमन्त्रीले टिकटकमाथि एक वर्षको प्रतिबन्ध घोषणा गरेका छन् । बालबालिकामाथि पार्ने असरको चिन्तालाई लिएर उनले प्रतिबन्ध घोषणा गरेका हुन् ।  

अल्बानियाले गत महिना स्कुलमा १४ वर्षीय किशोरमाथि भएको छुरा प्रहारको घटनालाई लिएर टिकटकमाथि प्रतिबन्ध लगाएको हो । अल्बिानियाका प्रधानमन्त्री एडी रामाले शनिबार यो प्रस्तावित प्रतिबन्ध जनवरीमा सुरु हुने घोषणा गरेका छन् ।

टिकटकले यो प्रतिबन्धका विषयमा अल्बानिया सरकारबाट स्पष्टीकरण मागिरहेको बताएको छ । टिकटकले १४ वर्षीय केटालाई छुरा प्रहार गर्ने व्यक्ति र पीडितको टिकटक अकाउन्ट भएको प्रमाण नपाएको जनाएको छ ।

बीबीसीका अनुसार अल्बानियाको दक्षिणी तिरानामा एक स्कुलमा गत महिना छुरा प्रहारबाट ती किशोरको मृत्यु भएको थियो भने अर्का एक विद्यार्थी घाइते भएका थिए । उक्त घटना गराउने झगडाको जड सामाजिक सञ्जाल भएको बताइएको छ ।